IGcokama licelele iChalaha umkhuleko koweNdlabeyiphika
UMCULI kamaskandi uMthandeni “Igcokama Elisha” Manqele usenxuse abalandeli bakamaskandi ukuthi bakhulekele uzakwabo uMjikijelwa “Ichalaha LikaShafuza” Ngubane oxinwe wukugula.
UMjikijelwa ubengomunye wabaculi obekulindeleke ukuthi anandise emcimbini weGcokama, Indlabeyiphika Maskandi Festival, e-Ellis Park Arena, ngoMgqibelo kodwa wagcina engakwazanga ukufika ngenxa yokubambeka.
Induna yabalandeli futhi engumkhulumeli weMjikijelwa Music Production, uSoh Mkhonza, yatshela leli phephandaba ngesonto eledlule ukuthi uMjikijelwa uvuvukala izinyawo nemilenze ahluleke nokuhamba. Uphinde abanjwe nayinkwantshu ezandleni okwenza kube nzima ukushayela nokudlala isigingci.
“Ufikile umyalezo kimi ukuthi uMjikijelwa ubambekile futhi ngiyazi ukuthi ubenathi ngenhliziyo. Ngiyaxolisa kubalandeli ngokungaliboni Ichalaha. Sengathi bengalibeka emkhulekweni. UmfokaNgubane wayefika ezongibona esibhedlela ngigingqwe yimoto.”
Igcokama, eliphinde lizibize ngeNdlabeyiphika, lithe lijabule ngendlela umcimbi walo ohambe ngayo.
“Akasekho umculi engincintisana naye. Ngingancintisana nomengameli wezwe kuphela ngokugcwalisa abantu enkundleni. Ngibonga izinkampani ezingesekile iStandard Bank nenkampani yezimpahla engigqokisayo iCutty.”
Ngokwe-www.travelground. com, i-Ellis Park Arena imumatha abantu abawu-6 300 uma behleli phansi.
Umsakazi woKhozi FM, uNgizwe Mchunu obebambisene noZimdollar, ekuphatheni uhlelo ubengawuvali umlomo ngezinga lomcimbi.
Abanye abaculi abebeshiyelana inkundla kubalwa kubo uShwi noMtekhala, Ali Mgube, Imfezi Emnyama, Amageza Amahle, Osaziwayo, Jaiva Zimnike nabanye.
“Ngiyabonga kubafowethu abangizimazisile, kukhombisa ukubambisana okuhle esinakho.”
Uthe manje usebheke ukugcwalisa inkundla yemidlalo iMoses Mabhida, eThekwini.
“Bengisakhombisa abantu amandla enginawo. Mhlawumbe ngizoqala ngigcwalise enye i-arena kodwa ngizofika eMabhida.”