Badidekile ngodutshulwe wathunjwa ‘amaphoyisa’
USAMANGELE umndeni wowesilisa waseMatata, ngaseNanda, okuthiwa udutshulwe ngabazenze amaphoyisa base bemthumba, okuyimanje akwaziwa ukuthi ukuphi.
UMnuz Mzameni Scelo Magwaza (33) kuthiwa uthunjwe ngoLwesihlanu ebusuku ehlezi nomzala wakhe oneminyaka engu-22.
UMagwaza kuthiwa ungqongqozelwe amadoda athe angamaphoyisa.
Kuthiwa uvule umnyango wadutshulwa esiswini.
Abasolwa kuthiwa bamfaka emotweni bashaya bachitha. Umzala wakhe kuthiwa bamshiyile endlini.
Umfowabo kaMagwaza, uMnuz Sthembiso Magwaza, uthe banovalo ngoba abazi ukuthi bamshonisephi.
“Siyesaba ngoba asazi ukuthi ngobani abahlasele umfowethu. Noma sibuza amaphoyisa athi awazange athumele muntu ukuba azolanda umfowethu. Okusididayo wukuthi kungani bemdubule base beyamthatha nokuthi bahloseni ngokwenza lokhu,” kusho uMagwaza.
Uthe umfowabo uthuthela umphakathi impahla ngeveni yakhe.
Kusanda kuhlaselwa umzala wabo uMnuz Mhlengi Gwala ongumdlali oshova amabhayisekile. UGwala babezama ukumsika imilenze. Abahlaseli bakhe bebengakaboshwa.
Umndeni ubize amaphoyisa ngoLwesihlanu kodwa aze afika ngoMgqibelo.
Umndeni uthi kufike nophiko lwezinja. Kuthiwa bezilandela umkhondo kodwa zame lapho egitsheliswe khona imoto.
Okhulumela amaphoyisa KwaZulu-Natal uCaptain Nqobile Gwala uthe kuphenywa icala lokuthumba nokuntshontsha njengoba kuthathwe namafoni amabili .