Bayavela abalandeli bodlame
BAZOVELA namhlanje eNkantolo yeMantshi eThekwini abasolwa ababili ababhekene necala lokudala udlame emphakathini nelokulimaza impahla, emdlalweni weKaizer Chiefs ekhishwe yiFree State Stars kuma-semi final eNedbank Cup eMoses Mabhida Stadium ngoMgqibelo ebusuku.
IChiefs ihlulwe ngo 2-0 kulo mdlalo, inqwaba yabalandeli yangena enkundleni yashaya onogada, yalimaza nemishini yokuqopha umdlalo.
Okhulumela amaphoyisa KwaZulu-Natal uCaptain Nqobile Gwala uthe babili abantu ababoshiwe.
“Abasolwa ababili besilisa abaneminyaka engu27 no-33 baboshiwe emuva kokuba abalandeli bebe nodlame bangena enkundleni. Bazovela enkantolo yaseThekwini kusasa (namhlanje). Ngokombiko kunabalimele ngesikhathi kunesixakaxaka. Uphenyo lwamaphoyisa lusaqhubeka,” kusho uCapt Gwala.
Bekunamahemuhemu okuthi kukhona unogada ogcine ngokushona kodwa uCapt Gwala uthe bebengakuwutholi lowo mbiko.
Isolezwe lithole ukuthi bathathu onogada abangeniswe esibhedlela ngoMgqibelo, namaphoyisa amabili.
UMnuz James Dlamini ongumphathi we-Aneme Security uthe konogada bakhe kulimale abesilisa ababili noyedwa wesifazane.
“Bobathathu bakhishwe esibhedlela izolo (ngoMgqibelo). Omunye ulandwe ngabo-3 (ekuseni) wagodukiswa. Sizokwenza konke okusemandleni ukuqinisekisa ukuthi bayalulama. Sizosebenzisana namaphoyisa ukuthola abenzi bobubi. Ngiyabonga nje ukuthi akukho muntu oshonile,” kusho uDlamini.
Uthe bezintathu izinkampani zonogada ebezinikwe umsebenzi. Inkampani yakhe ibikhiphe abangu-375. Uthe ngokwakhe isibalo ebesikhishiwe ngesijwayelekile futhi esigunyazwe yiPremier Soccer League. Uthe onogada ababaqashayo basuke beqeqeshelwe umsebenzi.
“Icala elibomvu ukuqasha umuntu ongenaso isitifiketi,” kusho uDlamini othe lesi simo sibe ngaphezu kwamandla.
“Noma ungaba nonogada namaphoyisa abangakanani ngeke ukwazi ukuvimba izinkulungwane zabantu. Abalandeli kumele bafunde ukuziphatha noma ngabe baphatheke kabuhlungu. Bekungcono ukube bamane bakhetha ukuhamba enkundleni ukubonakalisa ukudinwa kunokuthi balwe.”
Omunye umthombo osemaphoyiseni uthe kube lukhuni ukulawula abantu ngoba bavele baba ngaphezu kwabo. Abamaqembu epolitiki basigxekile isenzo sabalandeli.