Kusahlolwa umonakalo eMabhida
KUZOCACA kuleli sonto ukuthi mungakanani umonakalo odalwe abalandeli abavuke umbhejazane bacekela phansi inkundla yezemidlalo iMoses Mabhida eThekwini ngemuva kokuthi iKaizer Chiefs ikhishwe yiFree State Stars kuma-semi final eNedbank Cup ngoMgqibelo ebusuku.
IChiefs ihlulwe ngo 2-0 kulo mdlalo okusho ukuqhubeka kosizi kubalandeli bayo bengayazi injabulo yezicoco ngaphansi kukaSteve Komphela ogcine esulile ngawo uMgqibelo.
Izolo imenenja yeMoses Mabhida, uMnuz Vusi Mazibuko, ibisemhlanganweni nonjiniyela benkundla bebheka ukuthi mungakanani umonakalo futhi kuzodla malini ukuwulungisa.
“Mukhulu umonakalo owenzeke enkundleni kodwa lapho kufikela khona izivakashi ngaphandle akubanga nankinga. Sinonjiniyela ozohlola ukuthi mungakanani umonakalo futhi uzodla malini. Izindawo ezithinteke kakhulu yizihlalo, imipheme evimbela abalandeli ukuthi bangangeni ebaleni nodoti abawusaphazile. Okwamanje angifuni ukuqagela kodwa ngemuva kwamahora angu-48 sizobe sesazi,” kusho uMazibuko.
Bekuwumdlalo wesithupha iChiefs isebenzisa iMoses Mabhida njengekhaya layo. Phambilini abalandeli bake bazama ukushisa inkundla ngemuva kokuhlulwa yiBaroka FC emdlalweni weligi.
Owangempelasonto ufike besathuthumela ngemuva kokushaywa yiChippa United eFNB Stadium, eGoli koweligi nakhona abadala umonakalo.
Njengoba bese belimaza iMabhida nonogada abaphuthunyiswe esibhedlela, iChiefs ibisanda kuhlawuliswa yiPremier Soccer League (PSL) u-R250 000 ngomonakalo waseFNB Stadium. Isigwebo besilengiselwe u-R200 000 ngokuthi ingatholakali inecala elifanayo. UMazibuko uthe yize besigxeka isenzo sabeChiefs kodwa lokho ngeke kuphazamise ubudlelwano neqembu.
“Izinto ezifuze lezi zenzeka kuzona zonke izinkundla nakho angicabangi ukuthi kungabaphazamisa ubudlelwano. Noma ngubani olandela ibhola ubelindele ukuthi uma iChiefs ihlulwa kungasuka uthuthuva . Ngicabanga ukuthi sekuyisikhathi sokuthi abalandeli bebhola bashintshe indlela abacabanga ngayo ngoba noma ungafaka onogada namaphoyisa abangakanani ngeke ubavimbe abantu abasuke sebezitshelile ukuthi bazodlova,” kusho uMazibuko.
Imenenja yeChiefs, uBobby Motaung, ithe bayakuqonda ukudinwa kwabalandeli kodwa abahambisani nodlame.
“Akwamukelekile, wonke umuntu uyakwazi lokho. Akusikhona okwami ukuthi ngithi bayizidlova wukuthi nje abalandeli bacasukile kodwa indlela yokuziphatha ayamukelekile. Isinqumo esisithathile (sokusula kukaSteve Komphela) sisenzele bona.”
Okhulumela iPSL, uLuxolo September uthe bazolandela imigudu efanele ngaphambi kokuthi baphawule ngokugcwele.
Isitatimende esikhishwe yiPSL sithe bazobhekana nengalo yomthetho abathintekayo ngomonakalo owenzekile.