Owe-ANC uxwayise ngezingqungquthela
UNOBHALA-jikelele we-ANC uMnuz Ace Magashule uthi akumele bajahe ukuya ezingqungqutheleni ngoba zivamise ukubahlukanisa.
Ekhuluma eCity Hall eMgungundlovu izolo ehlangene nosihlalo nonobhala bamagatsha ngaphansi kwesifunda iMoses Mabhida, uMagashule uxwayise ngokuthi bazohlulwa okhethweni lwangonyaka ozayo uma bezoya khona behlukene.
“Asikasithathi isinqumo sokuthi nizoya engqungqutheleni noma cha, kunombono othi hlawumbe kungcono sigxile emkhankasweni wokhetho lwangonyaka ozayo sizimise izingqungquthela,” kusho uMagashule.
“Phambilini sasivumelane ngokuthi kumele siye ezingqungqutheleni zezifunda nezezifundazwe ekupheleni kukaMeyi kodwa sabuye sabheka ukuthi kuhle ngani ukuya ezingqungqutheleni kunokuthi sizimise, izingqungquthela ziyasihlukanisa kukhona abathi ubuholi obukhona sebuphelelwe yisikhathi ,” kusho uMagashule.
Uthe amagatsha azonquma ukuthi kuzomele kwenziwe njani ngodaba lwezingqungquthela ngoba athatha izinqumo.
UMagashule uphawula kanje, kunokudideka ukuthi kuzokwenzekani ngengqungquthela yesifundazwe ebhekwe ngabomvu obekulindeleke ukuthi ihlale ngempelasonto ezayo.
Isifundazwe sihlukene ngodaba lwengqungquthela. Kukhona abathi kumele ihlale abanye bathi ayihlehliselwe unyaka ozayo.
Uhlangothi lukaMengameli Cyril Ramaphosa luthi mayingahlali, oluhambisana nobenguMengameli uMnuz Jacob Zuma luthi ayihlale.
UMagashule uthe into ebaluleke kakhulu embuthweni ubumbano nokuzivuselela njengenhlangano. Uthe zonke izinqumo ezithathwe eNasrec kumele zifezwe.
Ukhwele wadilika komakadebona benhlangano wathi kumele bayeke ukuthatha izinhlangothi uma kunezinkinga.
Uthe umsebenzi womakadebona ukululeka inhlangano uma kunezinkinga hhayi ukugxeka ngokungakhi.
“Abaholi abadala benhlangano kungaba uMnuz Thabo Mbeki noMnuz Zuma bazohlale bengabaholi benhlangano hhayi ukuthi njengoba sebephumile ebuholini sekumele bangahlonishwa,” kusho uMagashule. Uthe bazobabhekelela omakadebona bamasosha ngoba babamba iqhaza elikhulu ekutheni leli zwe likhululeke.
UMagashule uthe baKwaZuluNatal ukuzohlola ukuthi isifundazwe simi kuphi mayelana namalungiselo ezingqungquthela zezifunda nesesifundazwe.
Umhlangano kaMagashule uqhubeke ngaphansi kwezimo ezinzima njengoba bekukhona amalungu abevalelwe ngaphandle eCity Hall efuna ukungena ngenkani. Amaphoyisa abesiqaphile isimo.
Isishoshovu se-ANC eMoses Mabhida uMnuz Maqatha Mchunu uthe bazolwa kuze kufike ekugcineni ukwenza isiqiniseko sokuthi ingqungquthela yesifunda sabo neyesifundazwe ayihlali.
Khona manjalo umengameli we-ANC uMnuz Cyril Ramaphosa ubeseThekwini okuyisifunda esikhulu eKZN, iPhini likaMengameli we-ANC uMnuz David Mabuza belijutshwe esifundeni iZululand nakwiLembe ukuyobheka umsebenzi we-ANC.
UMagashule, uNksz Bathabile Dlamini noMnuz Jackson Mthembu bebejutshwe eMgungundlovu nasoGwini.
USihlalo we-ANC uMnuz Gwede Mantashe, uNksz Thandi Modise, uMnuz Zizi Kodwa noMnuz Senzo Mchunu bebeseNewcastle naseDundee.
Umgcinimafa we-ANC noDkt Nkosazana Dlamini Zuma bebeseMusa Dladla naseMpangeni.