Bamgudluzile osomathuba uDkt Khoza: abahlaziyi
ABAHLAZIYI bepolitiki bathi ukhohlisa abantu uDkt Makhosi Khoza uma ethi ushiye ezepolitiki ngoba efuna ukuthuthukisa izilimi zomdabu kodwa iqiniso wukuthi ubeselahlekelwe ngamandla esethathelwe iqembu lakhe lepolitiki.
UMnuz Thabani Khumalo, ongumhlaziyi wepolitiki, uthe isinqumo sikaDkt Khoza sokushiya i-ANC wasithatha engacabangisisanga kahle yingakho kube lula ukuthi osomathuba bamgudluze kulo.
“Kunosomathuba bepolitiki oMpho Ramakatsa nabanye abadlale ngo-Dkt Khoza. Bambonile ukuthi uqale iqembu engacabanganga kahle bamhlwitha lona. Bakuzamile lokho kwi-EFF kwasho ukuthi uJulius Malema akabhenywa base beyozama uDkt Khoza,” kusho uKhumalo.
Uthe uDkt Khoza ubengasenawo amandla eqenjini lakhe azisungulele lona ngakho wabona kungcono ukuthi ahambe.Uthe osopolitiki besifazane kufanele babe nesibindi baqaphele ngaphambi kokusungula amaqembu.
Omunye umhlaziyi wepolitiki, uMnuz Ralph Mathekga, uthe uDkt Khoza ubengasenaso isikhundla eqenjini lakhe ngenxa yokukhishwa ngabantu ababefike kungathi bazomakhisa lona kanti bazoliqhwaga.
“UDkt Khoza usengasho nje athi usenombono omusha wokuthuthukisa izilimi zomdabu kodwa iqiniso wukuthi ubengasenandawo eqenjini lakhe ngenxa yosomathuba abaliqhwagile. Uke wamiswa yize engumholi. Ushiyiswe wukuthi ubengasenawo amandla okuguqula izinto eqenjini alisungula,” kusho uMathekga.
Uxwayise osopolitiki besifazane ukuthi babe nesibindi futhi bangavumi ukusetshenziswa ngosopolitiki bamadoda abafeza izinhloso zabo.