Ayikho egoba uphondo esitelekeni samabhasi
SINGENA osukwini lwesihlanu isiteleka samabhasi kuzwelonke emuva kokuthi izinyunyana zisinqabile isiphakamiso somqashi sokuthi amaholo anyuswe ngo-8% kulo nyaka bese enyuka ngo-8.5% ngonyaka ozayo.
INational Union of Metalworkers of South Africa (Numsa) igxeke abaqashi ngokufinyelela kwangqingetshe kwezingxoxo.
UNobhala-jikelele weNumsa, uMnuz Irvin Jim, uthe abaqashi abazange baxoxe kahle nezinyunyana ngisho sekungenelela abaxazululi yingakho izingxoxo zifinyelele kwangqingetshe.
“Asisamukeli isiphakamiso somqashi sokuthi amaholo anyuswe ngo-8% kulo nyaka ngoba akafuni ukusinikeza ezinye izimfuno. Sifuna abashayeli bathole umhlomulo uma besebenze ebusuku, kube nabashayeli ababili uma ibhasi ihamba ibanga elide. Abashayeli bobabili baholelwe ngesikhathi abasichitha besemabhasini ngoba basuke besebenza. Umqashi akafuni ukuzamukela lezi zimfuno zethu,” kusho uJim.
Uthe kubuhlungu ukuthi abashayeli bamabhasi ahamba amabanga amade banikezwa u-R595 wokudla nendawo yokulala.
“Uzoyitholaphi indawo yokulala ezokunika nokudla ebiza uR595? Kungani umshayeli wesibili engaholelwa umholo ophelele kodwa enikwa uR400 uma ebesebhasini elindele ukuphumuza uzakwabo? Sifuna umqashi anyuse amaholo ngo9.5% kulo nyaka no-9% onyakeni ozayo. Siqale sifuna u-12% kodwa sagcina sesifinyelele ku-9.5%. Umqashi akafuni ukusinika le mali,” kusho uJim.
Uthe kuyihlazo ukuthi kunabaqashi abangafuni ukuholela abasebenzi iholo elizobasiza ukuthi baphile kodwa balokhu beqhubekile nokubagqilaza.
UNkk Zanele Sabela okhulumela iSatawu uthe bazoqhubeka nokuteleka kuze kube izimfuno zabo ziyalalelwa ngoba bafuna abashayeli banikwe imihlomulo yokusebenza ebusuku.
UNkk Bronwen Dyke-Beyer obhekelele ezokuxhumana kwaGolden Arrow uthe amabhasi abo ngeke asebenze kuze kube isiteleka siyaphela.
UNobhala weNehawu uMnuz Zola Saphetha uthe uma abagibeli besiseka isiteleka kuzokwenza ukuthi abaqashi basheshe baphendule ezimfunweni zabasebenzi.
Kuzwele kakhulu kwezinye izifundazweni okubalwa iGauteng, iNorth West neWestern Cape lapho okuthiwa abanye abagibeli baphoqeleke ukubuyela emakhaya, bangaya emsebenzini nasezikoleni. Abagibeli bakhala ngokuthi bebeshaye amathikithi enyanga, okwenza bangabi nayo imali yokugibela amatekisi.