Uhlelo lokuqeda olayini abade kokaGigaba
BAZOPHELA nya olayini abade emahhovisi oMnyango wezaseKhaya emuva kokuthi uNgqongqoshe wawo, uMnuz Malusi Gigaba, ethe kuzoba nomshini ozothatha izithombe namanyela eminwe uma abantu beyoshaya omazisi.
Uveze lezi zindaba izolo esithangamini nabezindaba ebesiseGoli.
Sekukaningi Isolezwe libika ngolayini abade namakhompyutha angasebenzi emahhovisi oMnyango wezaseKhaya.
UGigaba uthe inkinga idalwa wukungahleleki komsebenzi emahhovisi ahlukene omnyango nokungabibikho kobuchwepheshe besimanje kwamanye.
“Sizotheleka emahhovisi ahlukene sixoxe nomphakathi sizwe ngawo ukuthi kufanele senzeni ukuze usheshe usizakale uma uze emahhovisi ethu. Olayini abade sizobaqeda futhi ngifuna wonke amahhovisi aze nezinhlelo ezicacile zokuthi bazoqedwa kanjani,” kusho uGigaba.
Uthe bazophinde babe namahhovisi ezasekhaya angomahamba nendlwana asetshenziswa kwi-internet emabhange ahlukene akuleli kusukela ngonyaka ozayo.
Amabhange azoba namahhovisi yi-Absa, Nedbank, FNB neStandard Bank.
Uphinde wathi bazophenya ukuthi olayini abade nesikhathi sokulinda kuncishiswe kanjani emahhovisi oMnyango wezaseKhaya e-Orlando West, Wynberg, Mgungundlovu, Centurion, East London naseMngeni eThekwini.
UGigaba uthe bazophinde bethule amahhovisi angu-78 awomahamba nendlwana ezindaweni ezihlukene.
“Sicela umphakathi usibekezelele sisalungisa isimo. Esikuthembisayo wukuthi sizowusiza ngakho konke okudingayo,” kusho uGigaba.