Imfundo iseqhulwini kosopolitiki eKZN
ABAZIBEKILE phansi kwezemfundo osopolitiki njengoba sanda isibalo salabo abathweswa izuqu ezisezingeni eliphezulu ezikhungweni zemfundo ephakeme.
Kungakapholi maseko umholi we-Academic Congress Union, uMntwana Mzonjani Zulu ethole iziqu zobudokotela e-Unisa, uSihlalo we-ANCYL KwaZulu-Natal uMnuz Kwazi Mshengu naye usethole iziqu ezihlonishwayo kwezomthetho iMasters in Law (LLM) eNyuvesi yaKwaZulu-Natal.
Engxoxweni neSolezwe ngemuva kokuthola iziqu, uMshengu uthe kuyamjabulisa ukuthi uyadlondlobala kwezemfundo njengoba kuyiziqu zesithathu lezi azitholile.
“Ngiqale ngathola iBachelor of Law (LLB), ngabe sengithola iHonours kwiPublic Policy and Development Studies njengoba manje sengithole iMasters in Law,” kusho uMshengu.
UMshengu ophinde abe yilungu lesiShayamthetho KwaZulu-Natal, uthe yize kunzima ukufunda usebenza kodwa uyajabula ukuthi ugcine eziqedile iziqu zakhe.
“Ngizimisele ngokuqhubeka nokufunda ngoba ngifuna ukuba yisibonelo entsheni esihlale siyikhuthaza ukuthi kumele ifunde,” kusho uMshengu.
Uthe izinselelo ezibhekene nezwe lakuleli zidinga abantu abafundile ukuze bazixazulule.
“Ibalulekile imfundo ikakhulukazi njengoba izinto ziguquka sekukhona nohlelo lobuchwepheshe iFourth Industrial Revolution, oluzokwenza kube nzima umuntu ongafundile ukuthi athole umsebenzi,” kusho uMshengu.
Unxuse intsha ukuthi ilisebenzise ithuba lemfundo yamahhala ukuze ikwazi ukuzithuthukisa.
Umxhumanisi we-ANC KwaZulu-Natal, uMnuz Sihle Zikalala, uthe ukuhlabana kwaMshengu kufakazela lokhu abahlale bekusho bewuhulumeni ukuthi imfundo ngezinye zezinto eziseqhulwini ezinhlelweni zabo.
UZikalala uthe maningi amalungu kaKhongolose asezinhlakeni ezahlukene asanda kuhlabana ngeziqu kubalwa kuwo uMnuz Sabelo Nyuswa othole iMasters kwiPublic Administration, Mnuz Siphiwe Zungu othole iMasters kwiFinance, Nkk Stella Khumalo ozuze iPhD kwi-Business Administration, Mnuz Siphumele Ndlovu othole iPhD kwi-Land Surveying noMnuz Siya Mncube othole iPhD kwi-Chemistry.