Kuhlaza iChiefs okwenziwe abalandeli eMabhida
UKUSHIYA iKaizer Chiefs kukaSteve Komphela yinto ekade yayifunwa abalandeli baleli qembu yize kwenzeke ngemuva kwezidubedube eMoses Mabhida Stadium, eThekwini, ngoMgqibelo ebusuku.
Lo mqeqeshi uyaqala ukwesula eqenjini selokhu aqala ukuqeqesha njengoba aziwa njengomuntu ongaliphonsi ithawula. Nokho bese kuphoqa ukuthi asule ngemuva kokushaywa yiFree State Stars ngo 2-0 emdlalweni owandulela owamanqamu weNedbank Cup nokuchaza ukuthi ushiye eNaturena engawinanga neyodwa indebe ngemuva kwamasizini amathathu.
UKomphela ufike kwiChiefs ngo-2015 waba ngumqeqeshi wokuqala waseNingizimu Afrika ukucija leli qembu ebelijwayele ukuqasha abaqeqeshi baphesheya kwezilwandle. Izinto azikaze zimhambele kahle uKomphela yize kwakuthembisa ngesikhathi efika. Udlale imidlalo yamanqamu emibili ngesizini yakhe yokuqala. Ushaywe yi-Ajax Cape Town ngo 1-0 kowamanqamu weMTN 8 kwathi kwiTelkom Knockout wabhaxabulwa yiMamelodi Sundowns ngo 3-1.
Ngemuva kwalokho akukho okuhambe kahle njengoba iChiefs ibilokhu idlala ngokulingana emidlalweni ye-Absa Premiership nokuyinto emenze waba nyamanambana kubalandeli baMakhosi. Nokho isimo asule ngaphansi kwaso asisihle njengoba abalandeli bevuke umbhejazane ngemuva kokuwashiswa ijezi yiFree State. Okwenzeke eMabhida yinto okufanele ukuthi akayithandi uKomphela njengoba kuhlaza iqembu okungangabazeki ukuthi lizohlawuliswa kanzima yiPremier Soccer League (PSL). IChiefs ibisanda kuhlawuliswa u-R250 000, kwalengiswa u-R200 000 ngemuva kokungaziphathi kahle kwabalandeli ngesikhathi bebhekene neChippa United eyabashaya ngo 3-0 koweligi emasontweni edlule.
Akungabazeki ukuthi kufanele iwukhokhe uR200 000 obulengisiwe njengoba kuphinde kwaba nezidubedube eMabhida.
Abaningi bazokhumbula uKomphela njengomqeqeshi okhipha isilungu ngamakhala kodwa ohluleke wancama ukuzakhela igama ngokuwina izindebe kwiChiefs osekunesikhathi yagcina ukuyiphakamisa. Nokho abalandeli kumele bakuqonde ukuthi ibhola umdlalo bangathathi izinto ngamawala. Akusizi ukucekela izinto ezinhle esazakha ngemali yethu.