Basizakala kalula abathumela izikhalo ngokuzibhala phansi
EZABATHENGI
SEKUKANINGI ngithola izingcingo kubathengi abanezinkinga emabhange, kwimishwalense nakwezinye izindawo.
Ngiyathanda ukubasiza kodwa inkinga engibhekana nayo wukuthi abazibhali izikhalo zabo, bagcina ngokukhuluma kuphela.
NgoLwesithathu umxazululi wezinkinga zomshwalense wesikhashana uNkk Deanne Wood uthule umbiko wakhe wezikhalo azitholile ngonyaka odlule.
Ukugcizelele ukuthi uma abantu befaka izikhalo kufanele kube wukuthi zibhalwe phansi, kuyabonakala nokuthi izinkampani zomshwalense azithandanga noma zihlulekile wukubasiza.
Lokhu kwenza ngikhumbuze abathengi nabafundi bale ngosi ukuthi kubalulekile ukuthi uma sinezikhalo sizithumele ngeemail lapho sisuke sikhala khona.
Iningi labathengi liphatha amaselula anobuchwepheshe besimanje anano-WhatsApp.
Awukwazi ukungitshela ukuthi uno-WhatsApp kodwa awunayo i-email. Ngiyacela niwabhalise ama-email ngoba noma usufaka isikhalo kubalulekile ukuthi sibe nobufakazi bokuthi uqale wakhala endaweni ethile kodwa bangakuphendula noma bakunika impendulo engakugculisi.
Asingene embikweni womxazululi wezinkinga zomshwalense wesikhashana.
UNkk Wood uveze ukuthi uxazulule izikhalo ezingu-9 962 ngezinsuku ezingu-131.
Imali akwaze ukuyibuyisela kubantu ingaphezu kuka-R87 million. “Uma abantu befaka isikhalo kufanele basinikeze nobufakazi esizosebenzela phezu kwabo. Kungaba yizincwadi abazithumelele umshwalense noma amaemail lapho bebephendulana khona nenkampani,” kusho uNkk Wood.
Uthe izikhalo eziningi abazitholayo ngezomshwalense wezimoto ezingu-49%, kulandele umshwalense wezindlu ngezingu-20%, kube owezinkampani ngo7.9% bese kuba yizikhalo zomshwalense wempahla yasendlini ezingu-6.2%.
“Isikhathi esiningi abantu bakhala ngesimo sezulu, abashayeli yizingozi nezinye izigameko kanti labo abasuke befake isikhalo ngomshwalense wempahla yasendlini basuke begqekezelwe. Senza konke okusemandleni ukuxazulula izinkinga futhi asivuni izinkampani kodwa sebeka eqhulwini izinkinga zomphakathi,” kusho uNkk Wood.
Ngithole umbiko kaSolwazi Bonke Dumisa awuthule kwi-International Conference on Customer Redress ebiseStellenbosch.
Uveze ukuthi bangu25.08 million abantu baseNingizimu Afrika abanezikweletu, abangu-12.21 million bazikhokhela ngesikhathi futhi amagama abo mahle ezinkampanini ezikweletisayo.
Abangu-9 million banamagama angcolile kwabakweletisayo okusho ukuthi abakhokhi ngesikhathi noma abakhokhi nhlobo.
UDumisa uthe abantu akufanele badale izikweletu kodwa kufanele bakhokhele abanazo ukuze bonge imali bese kukhula umnotho wezwe.
Njengoba uDumisa eyilungu leNational Consumer Tribunal uveze ukuthi baningi abantu abacela ukulungiselwa izinkinga zezikweletu.
Ngonyaka odlule uDumisa uthi ngu-80 000 owafaka izicelo zokuthi ukhokhe imali encane ngezikweletu zawo.
Kulo nyaka uthe balindele ukuthola izicelo ezingu-100 000.
Uveze ukuthi abantu abakweleta kakhulu ngabaseGauteng kwazise bakweleta u-R54.24 billion, kulandele abaseWestern Cape ngo-21.35 billion, kube abaKwaZulu-Natal ngoR16.83 billion bese abantu bakwezinye izifundazwe zakuleli bakwelete u-R33.21 billion.
Uthe asikho isidingo sokuthi abantu bangalali ebusuku ngenxa yezikweletu kodwa bangathinta iNational Credit Regulator noma iNCT ukuze ibasize ukuthi bakhokhe imali encane.
Umthetho osiza abacwile ezikweletini iNational Credit Act 34 ka-2005 ulekelela ukuthi abantu bangadlelwa impahla kodwa bakwazi ukuxoxa nababakweletayo ukuthi bakhokhe kancane.
UDumisa uzwakalise ukukhathazeka ukuthi balindele izicelo ezingu-100 000 zabazosizwa ngezikweletu ekubeni bengu-9 million abacwilele.
Uthe ngenyanga bahambisa izicelo ezingu-3 000 zabantu abacwile ezikweletini abadinga usizo baseGauteng, Western Cape naKwaZulu-Natal.
Uveze ukuthi izicelo zisuke sezixazululiwe ezinsukwini ezintathu.
Uthe nabantu bezinye izifundazwe bayazifaka izicelo zokusizwa okusho ukuthi ngenyanga ihhovisi lakhe lifaka izicelo zabantu abangu-4 000 ezinkantolo zaseNingizimu Afrika.
Abantu bangaxhumana ne-National Credit Regulator ngokushayela u-0860 627 627
E-mail: complaints@ ncr.org.za eminye imininingwane itholakala ku-www.ncr.org.za
Umxazululi wezinkinga zomshwalense wesikhashana utholakala ku-0860 726 890/0860 662837
Email: info@osti. co.za noma ku-www.osti.co.za
Uma unenkinga edinga ezabathengi ungangithinta ku-031 308 2743/ boniswa. mohale@inl.co.za