Badelise izihlwele kobuhlelwe wuKhozi
IPHENDUKE intandokazi emcimbini we-jazz obuseNewcastle insizwa yaseWestern Cape, uCameron Ward, ohamba ezinyathelweni zomkhaya wakhe uJonathan Butler no-Ernie Smith waseWentworth, eThekwini, kulo mculo nakuba izingoma zayo zigxile esigqini sikaJimmy Dhludhlu waseMozambique.
Lo mcimbi obuhlelwe uKhozi FM, obuseNewcastle Showgrounds, ubuhanjelwe nayisilomo saphesheya kwezilwandle u-Oleta Adams oqale wacula izingoma zakhe abantu abebengazazi bavele babhocobala.
Uqale wakhuluma nezihlwele ezinxusa ukuba zivote. “Ngesonto elizayo sizobe sigubha uSuku lweNkululeko. Lokho kusho ukuthi ziphathele impilo yakho, (uma sekuvotwa) uvote. Ukhumbule ukuthi awusesona isisulu kodwa uwumphumeleli.”
Uvalelise ngengoma eyayikhonzwe ngumengameli wokuqala wentando yabantu uNelson Mandela ethi Something Inside So Strong kaLabi Siffre.
UThami Shobede owalala isibili kuma-Idols SA ushukumise inkundla ehlonipha uWinnie Madikizela-Mandela ngengoma yengwazi ye-reggae uBob Marley ethi One Love. Nomdlali wesigingci ona-12, uLuthando Jackson, uqhulule amanoni akhe e-jazz okubalwa nelithi Romance.
Abanye abanandisile nguRingo Madlingozi, Zonke, Zamajobe, Brian Thusi, Themba Mkhize, Sjava, Nomalanga Hlubi, Nokulunga Mvuyane, Mnqobi Duma, Sun Xa Experience noBrenda Ndebele.
Abaphathi bohlelo bekunguMandla Mdletshe noSelbeyonce kanti ezicukuthwaneni bekukhona uSbu Buthelezi, DJ Mngadi nabasakazi beGwalagwala FM okubalwa kubo noMadumane. UMandla nozakwabo uKhetha Gwala basakaze izinhlelo zabo kulo mcimbi.
Umgqugquzeli, uThulani Maphumulo, uthe amabombo azobheka eMhlathuze Sports Complex eRichards Bay ngoJulayi 28 lapho kuboshelwe khona uChris Walker.