Bagubhe olokuzalwa kukaSfiso
U-AYANDA Ncwane, unkosikazi wowayeyisilomo somculo wowokholo esingasekho, uSfiso Ncwane, uzokhipha incwadi ekhuluma ngempilo yabo.
U-Ayanda noNcwane, owashona isigubhukane ngo-2016 ngemuva kokugula isikhashana, base beneminyaka engaphezulu kwengu-10 beshadile. Banamadodana amabili uNgcweti noMawenza.
“Incwadi izobe ikhuluma ngempilo kaNcwane, impilo yethu nezindaba ezingaziwa ngempilo yethu. Kahle hle ngibhala inhliziyo yethu. Izinto abantu abangazazi zihlanganisa ukuthi impumelelo yethu siyithole kanjani sisuka phansi njengoba besihlala emizini yabantu sishadile, izinqumo esizithathile nokunye,” kusho u-Ayanda.
Incwadi izophuma ngoMeyi 31 kanti isihloko sayo sizothi For The Love of Sfiso Ncwane.
U-Ayanda ukuveze lokhu ngoMgqibelo eseMthwalume lapho bekunomcimbi wokugubha usuku lokuzalwa kukaNcwane. Ukube usaphila ubezobe ehlanganisa iminyaka engu-39.
Umcimbi ubusezinkundleni zemidlalo iMantiyaneni Sport Ground ngaseMthwalume High, KwaQoloqolo.
Bekudlalwa ibhola kwanqoba i-Ayaphila Ladies kwabesifazane. Kwabesilisa bekugadulisana iBlack Swallows ne-Ifafa FC edle umhlanganiso. Ihlomule ngesiklabhu, indondo, ijezi noR3 500 ongukheshi.
U-Ayanda ubonge ukwesekwa abantu basendaweni noMasipala waseMzumbe, osomabhizinisi nabo bonke ubuholi bomphakathi. Uze wancokola ngokuthi izingane zakhe, abehamba nazo, zizobuya zizothatha khona.
Ngemuva kokudlalwa kwebhola kube nedili lomculo. Bekunandisa uDJ Nkoh obedlala izingoma zikaNcwane azenze kabusha zashaya ngesigqi se-house, Thinah Zungu, Abathandwa, Thokozani “Somnandi” Langa, Khuzani “Indlamlenze” Mpungose nabanye.
Abantu bebephume ngobuningi babo izingane zidlala kuma jumping castles.