UNgobeni weseka uKhuzwayo ngokushiya iChiefs
UNOZINTI weFree State Stars, uThela Ngobeni, uyaseseka isinqumo sikaBrilliant Khuzwayo, osekuqinisekisiwe ukuthi uyashiya eNaturena ekupheleni kwesizini ka-2017/2018, sokushiya iKaizer Chiefs.
UNgobeni ngomunye wonozinti abagcine beshiyile kwiChiefs eminyakeni edlule ngenxa yokukhonya kuka-Itumeleng Khune ezintini zaMakhosi. Ufudukele kwiMamelodi Sundowns lapho efike wabhekana nesimo esifanayo kuDenis Onyango waseKenya. UNgobeni ubolekiswe kwi-Ea Lla Koto yiSundowns.Uqokwe njengomdlali ovelele ngesikhathi iStars ikhipha iChiefs kowandulela owamanqamu weNedbank Cup eMoses Mabhida Stadium, eThekwini, ngoMgqibelo ebusuku.
Kube nzima kuKhuzwayo ukuthola ijezi kuKhune selokhu afika eNaturena. Uhluleke noma esecela ukuthi bashintshane noKhune, omunye avimbe emidlalweni yomkhumulajezi omunye avimbe kweyeligi. Ulandela uReyaad Pieterse ojokole kumasizini amabili adlule ekhala ngokungadlaliswa, wajoyina iSuperSport United.
“Ngeke ngazi ukuthi ufunani, yisinqumo sakhe.Uyazazi ukuthi ufunani njengomdlali webhola. Uma ebona ukuthi kufanele ahambe leso yisinqumo sakhe. Kodwa engikwaziyo ngathi badlali bebhola wukuthi sifuna ukudlala. Ulitholile ithuba phambilini kodwa ngebhadi ngeke sidlale sonke ikakhulukazi thina bonozinti. Uthola ukuthi kwamanye amaqembu ababashintshanisi onozinti, kuvimba oyedwa emidlalweni yomkhumulajezi neyeligi. Kuyishwa. Uma enquma ukushiya iKaizer Chiefs ngimfisela okuhle,”kusho uNgobeni.
Umqeqeshi weStars, uLuc Eymael, uthathe isinqumo sokuvimbisa uNgobeni kweyomkhumulajezi. KweyeAbsa Premiership kuvimba u-Ali Sangare wase-Ivory Coast. Lokhu kwenza uNgobeni abe nesiqiniseko sokuthi uyena ozoba sezintini zeStars kowamanqamu weNedbank Cup ezoba seKapa.
UNgobeni uvumile ukuthi kuyiphazamisile inqubekela phambili yakhe ukubanga ijezi nonizinti abaphambili. Baningi eMzansi onozinti abahlale ebhentshini, bagcina bengagqamanga ebholeni. Kulaba onozinti kukhona uLucky Shiburi ohlale ebhentshini le-Orlando Pirates iminyaka no-Aubrey Mathibe owadlala kwiChiefs, Moroka Swallows nakuMaZulu.
“Bengihlala ngibanga ijezi nonozinti bamaqembu esizwe. Bekunzima. Ngicabanga ukuthi yilokho okungibuyisele emuva. Kodwa inselelo kube wukuthi ngikhule njengonozinti ngoba uma usebenza nonozinti abaphambili uthatha ezinye zezinto abazenzayo ezenza baqhakaze.Kubenzima kakhulu kimina kodwa ngeke ngibheke emuva ngizigxeke,” kusho uNgobeni.
“La maqembu angisayinisile abone ikhono kimina. U-Itu ubenza kahle kakhulu, ngaya kwiSundowns ngaficana noWayne Sandilands, kwafika uKennedy (Mweene), uDenis wayithatha indawo. Kodwa bengilokhu ngizama ukufunda ezintweni abazenzayo. Nginethemba ukuthi izinto zizoshintsha nami ngizolithola ithuba lami.”