ISharks ibuyise isithunzi ngamaStormers
I-CELL C Sharks ibuyise isithunzi ngokunqoba kunzima kwiDHL Stormers okuyizimbangi zayo ezinkulu kwiVodacom Super Rugby emdlalweni obushubile ngoMgqibelo eJonsson Kings Park, eThekwini.
Lena bekuyiwini yesithathu yeSharks kule sizini okugqame kuyona amaphutha omqeqeshi wayo.
ULukhanyo Am, Jean-Luc du Preez noThomas du Toit yibona abashayele iqembu likaRobert du Preez ama-try okuyiwona awinise leli qembu eliphoxe abalandeli ngeledlule linenebulwa yiVodacom Bulls ngo 40- 10 ekhaya.
Bazamile nokho abadlali abahlanganisa uRaymond Rhule noRamone Samuels ngamatry nokho kwacaca ukuthi iqembu lasekhaya liluzwe kahle ulaka lwabalandeli kulandela umphumela weBulls ngeledlule. IStormers isendaweni yesine kwilog yaseNingizimu Afrika.
Ngaphandle kwe-try kaRhule ayishaye ngomzuzu ka-39 isiwombe sokuqala salo mdlalo besizithulele nje kugqame amaphutha abenziwa ngabadlali. Bekulindelekile lokhu kwazise womabili la maqembu awazange aqale kahle kwiSuper Rugby ekubeni kade kuyiwona athenjwe ngaphezulu kweEmirates Airlines Lions ehanjelwe wumqeqeshi ngesizini edlule.
Nokho iLions isalokhu izihole njengesibani kwilog ehlangene kwazise izidlela amahlanga kunoma ubani ehlangana naye kulo mqhudelwano.
Okuthokozisile kubalandeli beSharks ukuthi kuningi okukhombise ukuthi bafundile ekunenebulweni yiBulls emdlalweni odlule. Indlela abadlali baphambili abebezinikele ngayo akuzange kubonakale nokuthi akekho uTendai “Beast” Mtawarira. Kuyiwa ekhefini iSharks ilandela ngemuva nje, bekungafanele kulandela amathuba atholwe nguCurwin Bosch noRobert du Preez Jnr.
Kube sengathi zichathwe ngopelepele ezikaDu Preez zibuya ekhefini lapho bese kubhoke uMakazole Mapimpi obe nesandla cishe kuyona yonke iminyakazo yabafana basekhaya esiwombeni sesibili. Okucacile lapha futhi ukuthi iSharks ibizishintsha izindlela zokudlala hhayi le nto yayo yokugxila emandleni noma isidingo singasekho.
Kulo mdlalo iSharks ibiqinisekisa ngaso sonke isikhathi ukuthi ibhola lisengxenyeni enkulu yezivakashi kanti nokubaxina ngamabhola ahamba phezulu kukhombise ukukhula kuSharks ngoba iStormers besisenkingeni enkulu uma ibhola lisemoyeni. Imiphumela ihambe kanje: Brumbies 20-25 Jaguares; Sharks 24-17 Stormers; Bulls 28-10 Rebels; Reds 12-36 Chiefs; Crusaders 33-11 Sunwolves; Waratahs 0-29 Lions; Blues 16-34 Highlanders.