I-Maritzburg imangaze iSundowns
ABALANDELI beMaritzburg United bavume uNoyana eHarry Gwala Stadium iqembu labo liqopha umlando lizibekisela indawo kowamanqamu weNedbank Cup ngokukhipha izinkunzi zasePitoli, iMamelodi Sundowns, izolo ntambama.
Iqembu likaFadlu Davids, elilokhu liqhubeke njalo nokubhala kabusha umlando kwiPremier Soccer League (PSL), lizobhekana neFree State Stars kowamanqamu eCape Town Stadium, eKapa, ngoMeyi 19. IStars ikhiphe iKaizer Chiefs ngo 2-0 eMoses Mabhida Stadium, eThekwini, ngoMgqibelo emdlalweni ophele ngodweshu.
Amagoli kaLebohang Maboe, Mxolisi Kunene noFortune Makaringe aqinisekise ukuthi iqembu laseMphithi liqopha umlando ngokudlala okokuqala kowamanqamu kwiPSL.
Igoli leSundowns kube yisipho esivele kunozinti we-United, uRichard Ofori, olibambe walidedela ibhola ebelishaywe nguGaston Sirino ngomzuzu wokuqala.
Iqembu lasekhaya alizange lingenwe yintola emadolweni, kunalokho belilokhu libuzile lihlasela iSundowns nokugcine ngokuthi lithole igoli lokulinganisa elize noMaboe ngaphambi kokuthi kuyiwe ekhefini.
Nakuba u-Ofori enze iphutha esiwombeni sokuqala kodwa ubuye waligeza igama lakhe evimba ibhola elibi ebelithunyelwe nguSibusiso Vilakazi. UThemba Zwane eliwele kuyena ibhola uhlulekile wukuqedela umsebenzi, walishaya phezulu kwamapali ibhola.
Umdlalo ushiwe uqala waze wayophela, womabili amaqembu ezimisele nabalandeli bawo bephume ngezinkani ingekho ngisho indawo yokubeka isinqe kuzona zombili izindawo ezibekelwe ukuhlala enkundleni.
Esiwombeni sesibili iTeam of Choice iqhubekile nokudlalisa okweqembu lasekhaya ikhombisa ukungayesabi iSundowns yize iphethe izibabuli zabadlali.
Ngesikhathi kuqhubeka umdlalo umqeqeshi wamaBrazilians, uPitso Mosimane, wenze ushintsho ephoqwa wukulimala kuka-Anele Ngcongca. Indawo yakhe kwesokudla emuva ithathwe uThapelo Morena.
USirino ucishe waphinde wabeka izivakashi phambili kodwa wasebenza u-Ofori echitha ibhola. Emuva kwalokho kube yikhona kodwa nayo kayibanga nazithelo.
Ngesikhathi kuqhubeka isikhathi amaqembu ebambene ngezihluthu kungekho efuna ukugoba uphondo, imimoya ibiya ngokunyuka ebhentshini, uManqoba Mngqithi, iphini likaMosimane, wacishe wakhonjwa indlela evukwa wulaka ethethisa unompempe, uVictor Hlungwani, obenikeza uSirino ikhadi eliphuzi ngenxa yokudlala kabi.
Akuphelanga ngisho umzuzu, uSirino waya kogeza ethola ikhadi lesibili eliphuzi ngemuva kokudlalisa kabi uMaboe.
UMosimane ukhiphe uVilakazi wafaka uKeletso Makgwala, ushintsho abevele ezimisele ngokulenza ngaphambi kokuthi kukhishwe uSirino ngekhadi elibomvu.
Ngomzuzu ka-85 uKunene, ongene endaweni kaDeolin Mekoa, ubeke iqembu lasekhaya phambili kwavungama uMphithi.
UMosimane ukhiphe uPercy Tau ebezimpheke ngebhodwe elincane izitobha ze-United, wafaka uJeremy Brockie. NoDavids ubengazibekile phansi, wadonsa u-Andrea Fileccia wagaxa uMohau Mokate. Kuthe kusenjalo wawuvala umcimbi uMakaringe umdlalo usuya ngasekupheleni ngegoli lesithathu.
I-Team of Choice neSundowns kuzophinde kubhekane emdlalweni we-Absa Premiership ngoLwesithathu.
Khonamanjalo, iBidvest Wits ibambane ngo 1-1 nePolokwane City emdlalweni weligi izolo ntambama.