Uchitha izinsolo zokuthi bathwele
INDODAKAZI yezimpunyela zaseThekwini, uSbu noShaun Mpisane, uSbahle, iphawule okokuqala ngofeleba wenhlwathi eyawufaka ekhasini layo kwi-Instagram, kwaqubuka izinsolo zokuthi lo mndeni uthwele ngayo.
USbahle kuthiwa wafaka i-video yale nhlwathi ebonakala ishibilika endlini maqede wabhala ukuthi imfuyo yakubo iphuma kogeza. Kuthiwa uyikhiphe ngemuva kwemizuzu emine eyifakile. Ngebhadi abaningi bese beyibonile futhi sebeyithathile yagcina isisabalele ezinkundleni zokuxhumana. Lokhu kususe izinkulumo abaningi bethi lo mndeni uphunyeleliswa wukuthi uthwele.
Izolo uSbahle uphendule kwi-Instagram ekhasini lakhe ngendaba yenyoka wathi, “Uma izinto zikuhambela kahle, abantu benza imizamo yokudicilela phansi isithunzi sakho. Kubona bonke abebesabalalisa amahlebezi okuthi ngithwele bangibangela isicefe nangemibuzo engasile, ngethemba ukuthi baphendulekile ngalokhu engikubhalile.” Umbhalo ubuhambisana ne-video yowesilisa okukholakala ukuthi ungowaphesheya ehlezi nezinyoka okukhona kuzona nalena efakwe uSbahle. Lo mlisa kuthiwa ngowaseSouth Beach eMiami, e-USA kanti uzifuyile lezi zinyoka.
Isolezwe lizame ukuthola uSbahle ukuze aziphendulele ngalezi zinkulumo ezibhekiswe kuyena nomndeni wakhe.
Ethintwa ucele ukuthunyelelwa i-email aphendule kuyona. Imibuzo athunyelelwe yona ugcine engayiphendulanga kwaze kwashaya isikhathi sokushicilela.
Iningi labebephendula emibhalweni yakhe ekhuluma ngala mahlebezi ku-Instagram belizwelana naye. Kukhona abebethi abantu banomona ngoba ephumelele empilweni uSbahle. Abanye bebethi bekungamele aze azikhathaze nangokuthi abaphendule kulezi zinsolo ngoba abakholwa ukuthi yinto ekhona.