Amajaji abona enekusasa ekudanseni uZola Nombona
AMAJAJI ohlelo lomdanso iDancing with the Stars atshele umlingisi uZola Nombona (osesithombeni) ukuthi angalinge alishalazele ithalente lakhe lokudansa.
Lokhu bakusho ngeSonto esiqeshini sokugcina sohlelo la isicoco sihambe nomculi wolimi lwesibhunu uConnell Cruise.
UZola nophathina wakhe uTebogo Mashilo bebeyingxenye yosaziwayo abathathu bokugcina akade besele.
Laba bachaze abaningi esiqeshini sokugcina njengoba kuyona yomithathu imidanso abayenzile bechaze amajaji ngisho abalandeli bohlelo kulona lonke leli.
Elinye lamajaji alolu hlelo uDebbie Turner utshele uZola ukuthi uma engaqhubeka nokuba ngumdansi noma waluphi uhlobo angaya kude kukhona kokubili ukulingisa nokuba wumdansi.
“Uyamangalisa amasonto angu12 sikubona kulesi siteji wenza into yamehlo futhi awukaze uphoxe nangosuku olulodwa. Kwabonakala ngesiqephu sokuqala ngesikhathi uqengqeleza phambili ukuthi awuzile ukuzodlala kodwa uyayazi into oyizele,” kuchaza uDebbie.
Ufakazelwe yijaji lase-Australia uJason Gilkison ebeliyingxenye yalolu hlelo elifanise uZola nonopopi kagesi oshibilikayo esiteji.
“Awuphoxi ngizimisele ukuthi ngelinye ilanga ngikubone uhamba amazwe ngenxa yethalente onalo. Ngisho phesheya kwezilwandle uma kukhona imicimbi engiyenzayo ngiyokubiza ukuze uzofunda kwabanye abadansi,” kuchaza uJason.
Ezibongela uZola uthe ukube ubengekho uphathina wakhe obengamtotosi ngabe akafikanga la akhona.
“Uthando engilukhonjiswa ngabantu luyamangaza, ngiyabonga kakhulu ngokungicathulisa kukhona konke nakozakwethu ebesinabo ohlelweni,” kusho uZola.
Ebuzwa ukuthi umyalelo awunikwe amajaji wokungayeki ukudansa uzowenzenjani, uZola uthe okokuqala abantu abalinde usuku lwangeSonto njengoba kukhona into abazoyizwa kwi-iTunes.
UZola akafunanga ukuphumela obala ukuthi ngabe usengene emculweni yini kodwa uthe kukhona okusha okuzayo.
Kulo mcimbi kunandise iMafikizolo nensizwa yaseKapa eyadla umhlanganiso ohlelweni iThe Voice SA ngonyaka odlule uCraig Lucas.