Sitholwe eceleni komgwaqo isidumbu sobethunjiwe
SITHOLWE eceleni komgwaqo eMqeku, eNanda, izolo isidumbu sowesilisa obethunjwe ngabazenza amaphoyisa emzini wakhe.
UMnuz Mzameni Scelo Magwaza (33) waseMatata utholwe ngumshayeli weloli lamanzi ahanjiselwa umphakathi.
Ngokusho kukamfowabo, uMnuz Sthembiso Magwaza, umufi ubembozwe ngamahlamvu ezihlahla eceleni komgwaqo eseshonile.
“Emuva kokuba kuphume udaba kwiSolezwe namhlanje (izolo) sithintwe ngabanye abantu bethi asizobona ukuthi akusona yini isidumbu sakhe sotholwe eceleni komgwaqo. Umfowethu ubembozwe ngamahlamvu kodwa kucaca ukuthi ubulewe kwenye indawo wabekwa kuleya ndawo. Alikho igazi ebelibonakala endaweni yesigameko,” kusho uMagwaza.
Uthe njengomndeni basashaqekile ukuthi bekwenzenjani umfowabo aze abulawe.
“Kuyasidida kakhulu ukuthi kungani bemthumbe ekhaya bambulala base bembeka kule ndawo. Siyabonga kakhulu ngokuthi sikwazi ukumthola kodwa sisele nemibuzo eminingi. Sidumele ngoba besinethemba ukuthi sizomthola esaphila,” kusho uMagwaza.
Umufi kuthiwa isidumbu sakhe bese siqala ukuba nephunga njengoba athunjwa ngoLwesihlanu.
Amaphoyisa izolo akuqinisekisile ukuthi kutholwe isidumbu kodwa athi asesendaweni yesigameko ngakho acela ukubuye athintwe ngalolu daba.
UMagwaza kuthiwa ungqongqozelwe yiqulu lamadoda elithe lingamaphoyisa ngoLwesihlanu ebusuku kwathi uma evula wadutshulwa esiswini.
Abasolwa bamthatha bahamba naye ngemoto.
Umzala wakhe, oneminyaka engu-22, kuthiwa bamshiyile yena endlini.