Uzifikele mathupha emahhovisi aseMngeni
UNGQONGQOSHE woMnyango wezaseKhaya, uMnuz Malusi Gigaba, uthe zizoshintsha izinto emahhovisi alo mnyango ngoba akafuni kuphinde kube khona umuntu ozibulala ngoba engenawo umazisi nezinye izincwadi ezitholakala kuwo.
Izolo uGigaba uzifikele mathupha emahhovisi oMnyango wezaseKhaya eMngeni, eThekwini waxoxa nomphakathi ngezinkinga obhekana nazo ebuza nezikhulu zehhovisi ukuthi zizoyixazulula kanjani inkinga yolayini abade.
Ekhuluma noGigaba, uMnuz Siyabonga Gwala (24) waseClermont, uthe sekuphele iminyaka eyisishiyagalombili efaka isicelo sikamazisi.
Uthe akakwazanga ukubhala u-matric ngoba ubengenawo umazisi.
“Inkinga engihlangabezana nayo wukuthi uma ngize lana (eMngeni) kuthiwa angize nomuntu omdala ozongisayinela. Bashona abazali bami, akekho umuntu womndeni omdala ngoba nomamkhulu engangisele naye sewashona. Ngiyawudinga umazisi ngoba impilo yami imile, angikwazi ukunyakaza njengoba ngingenawo,” kusho uGwala.
UGigaba uzwelane noGwala wamtshela ukuthi uzosizakala wathathwa yizikhulu zaseMngeni zayoxoxa naye ngasese.
UNkk Nompumelelo Cele (53) waseNtuzuma, obezofaka isicelo sikamazisi wengane yakhe, uthe uyaqala ukufika emahhovisi aseMngeni ngoba ubebalekela olayini abade phambilini.
“Olayini bebengebade kodwa inkinga kube amakhompyutha angasebenzi. Sifike ngo-7 ekuseni kodwa baze baqala ukusebenza ngo-10.30 ekuseni bekhala ngokuthi ba-offline akukho abazokwenza uma amakhompyutha engasebenzi. Siyathemba ukuthi ukufika kukaGigaba kuzoshintsha izinto,” kusho uNkk Cele.
UNkk Phumzile Xulu uthe ufake isicelo se-passport kwi-internet kodwa uma efika eMngeni waqala phansi wama kulayini.
“Sifisa uGigaba angasebenzisani namabhange amane amakhulu kuphela kodwa afake naleli elinye ibhange elisetshenziswa ngabantu abaningi ukuze sikhokhe kwi-internet. Angisebenzisi ibhange elikhulu yingakho kuthe uma sengifika lana ngaqala phansi yize bengibhalise kwi-internet,” kusho uNkk Xulu.
UGigaba uqale umkhankaso wokulwa nolayini abade emahhovisi omnyango wakhe futhi uzogasela emahhovisi anezinkinga ezinkulu okubalwa kuwo elaseMngeni.
Uveze ukuthi izinkinga eziningi zidalwa wukungaphathwa kahle kwezikhungo ngoba umnyango wakhe usiza abantu abangu-56 million bakuleli nezinye izinkumbi zangaphandle.
“Ezinye izinkinga sizithole zikhona okubalwa ukungabhaliswa kwabantu uma bezalwa njengoba befaka izicelo zomazisi sebebadala. Ngithole nokuthi asinawo amahhovisi enele, isibonelo nje amahhovisi aseMngeni asiza abantu basePhoenix, Inanda, Ntuzuma naKwaMashu njengoba singenalo ihhovisi kulezi zindawo. Sidinga ukwandisa amahhovisi,” kusho uGigaba.
Uthe bazosebenzisana namabhange amakhulu okuyiStandard Bank, Nedbank, Absa neFNB ukuze abantu babhalisele omazisi abasha.
Ubadonse ngendlebe abantu baseNingizimu Afrika wathi bangatatazeli ukushintsha omazisi bakudala ngoba akusilo iqiniso ukuthi ngeke basebenze uma sekuphele unyaka.
“Abantu ababhalisele omazisi abasha ngesikhathi sabo ngoba abadala bayaqhubeka nokusebenza. Sizokwenza isiqiniseko sokuthi sandisa amahhovisi ethu siwavule nangoMgqibelo ukuze abasebenzayo basizakale ngezimpelasonto. Sizobuyisa nozwelo kubasebenzi bethu ngoba abantu bakhala kakhulu ngempatho,” kusho uGigaba.
Uthe bazoyilungisa nendaba yokungasebenzi kwemishini abale kuyo udaba lwe-internet evele inqamuke, ukulungiswa kwemishini ethatha izithombe nokunye.
“Sizoletha imishini ethatha amanyela eminwe nezithombe kanye kanye sibuyise isithunzi soMnyango wezaseKhaya. Isimo ngizosiqapha ngeso lokhozi ukuqinisekisa ukuthi abantu bayasizakala. Izikhulu zizogasela emahhovisi anezinkinga ukuze zibone ukuthi izinhlelo zokusiza abantu nokunciphisa olayini ziyasebenza yini,” kusho uGigaba.