Ukhathazekile unina wengane ‘eshaywe’ wudokotela
UYAVEVA unina wengane (5) yaseNewlands West okuthiwa ishaywe wudokotela wamazinyo ngempama ngoba isaba ukukhipha izinyo esibhedlela saseSydenham, iKing Dinuzulu.
Uthe lesi sigameko senzeke ekuqaleni kwale nyanga. UNksz Nomthandazo Nzama uthe indodana yakhe, uMelokuhle, beyivuvukele esihlathini futhi ikhala ngenxa yobuhlungu novalo lokukhipha izinyo.
Ngokusho kwakhe bafike esibhedlela emuva kwehora leshumi baze babonwa udokotela emuva kokugamanxa kwehora lesibili ntambama.
“UMelokuhle ubelokhu ekhala ngoba ubesaba ukukhipha izinyo. Kuthe noma sesingene egumbini likadokotela ngazama ukukhuluma naye ngimtshela ukuthi udokotela ngeke amjove ngoba ngizama ukumehlisa umoya. Udokotela uvele wamshaya ngempama esihlathini ngoba engawuvuli umlomo. Ngiphatheke kabi kakhulu. Kumanje akalikhiphile izinyo usesebenzisa ama-antibiotics ngoba useyasaba ukuya kudokotela. Uze asho ukuthi udokotela wamshaya ngempama,” kusho uNksz Nzama.
Uthe emuva kwalesi sigameko wabika kubaphathi besibhedlela ezitshela ukuthi luzosukunyelwa udaba kodwa akakaze athintwe ukuze abikelwe ngokuthi kwenziwani ngalo dokotela.
“Into engiphatha kabi wukuthi odokotela silindele ukuthi babe mnene ikakhulu uma beqondene nezingane.Ngazibuza ukuthi zingaki ezinye izingane azenza kanje,” kusho uNksz Nzama.
Okhulumela amaphoyisa KwaZulu-Natal, uCol Thembeka Mbele, ukuqinisekisile ukuthi amaphoyisa aseSydenham aphenya icala lokushaya.
Okhulumela uMnyango wezeMpilo KwaZulu-Natal, uNksz Ncumisa Mafunda uthe: “UMnyango ukhathazekile ngokushiwo yiphephandaba ngoba uma kuyiqiniso kuyobe kuphambene nemithetho nemigomo yokusebenza kwabezeMpilo. Usucele umbiko ogcwele esibhedlela esithintekayo ukuze kulandelwe imigudu yangaphakathi. Njengoba udaba selusezandleni zabomthetho, uMnyango awuzukwenaba ukuze benze umsebenzi wabo ngaphandle kokuphazanyiswa.”