Ingenyanga ezayo eye-ANC eKZN
IZOBA khona ingakapheli inyanga ezayo ingqungquthela ye-ANC KwaZulu-Natal ebhekwe ngabomvu.
Lokhu kuvezwe nguNobhalajikelele we-ANC, uMnuz Ace Magashule esithangamini nabezindaba, eCoastlands Hotel eThekwini izolo ngemuva komhlangano obushubile wamalungu ezigungu eziphezulu ze-ANC, iNEC neNWC kukhona kuwo noMengameli uMnuz Cyril Ramaphosa.
Amalungu ezigungu abe nomhlangano ehhotela kusukela ekuseni kwaze kwaba ntambama ebhunga kabanzi ngemibiko ayithole ezifundeni azihambelile eyozwa ukuthi athini amagatsha ngodaba lwezingqungquthela.
“Esikutholile wukuthi izifunda sezikulungele ukuthi kuyiwe engqungqutheleni yize kukhona izinkinga ezimbalwa kodwa okugqamayo wukuthi amagatsha amaningi ayayifuna ingqungquthela,” kusho uMagashule, wengeza ngokuthi isigungu esiphezulu senhlangano sizokhipha isinqumo ngosuku lwengqungquthela.
Uthe ngeke iphele inyanga ezayo ingabanga khona ingqungquthela ngoba ngoJuni kuqala imikhankaso yokhetho lwangonyaka ozayo.
UMagashule uphinde wamemezela ukuthi iKwaZuluNatal ingaphansi kohlaka olubizwa ngeProvincial Task Team (PTT) ngemuva kokuthi iProvincial Interim Committee (PIC) iphelelwe yisikhathi.
“Sibuyisele wonke amalungu ePIC sawenza iPTT, okuhle wukuthi iPTT inezinyanga eziyisishiyagalolunye isehhovisi futhi inamandla ewanikwe wuMthethosisekelo wenhlangano,” kusho uMagashule.
Uthe iPTT izoqhubeka nomsebenzi obusuqalwe yiPIC wokubumba isifundazwe nokwenza amalungiselelo ezingqungquthela.
UMagashule uncome ubuholi besikhashana be-ANC esifundazweni wathi benza umsebenzi omuhle.
Uthe kusukela bungenile ehhovisi benza konke okusemandleni ukuxazulula izinkinga zokuncishwa kwabantu ubulungu benhlangano.
UMagashule ukugxekile ukukhishwa kwezibhamu emihlanganweni ye-ANC.
Bekunokwehlukana phakathi KwaZulu-Natal mayelana nokuba khona kwengqungquthela njengoba kukhona abathi kumele ibe khona abanye bethi ayingabi khona.
Uhlangothi lukaRamaphosa alufuni ibe khona kanti oluhambisana nobengumengameli uMnuz Jacob Zuma lufuna ibe khona.
Umhlangano wayizolo ubunobuholi bonke be-ANC okubalwa nobezinhlaka i-ANCYL, ANCWL neVeterans League.
UMagashule uthe into abebebhunga ngayo emhlanganweni wukwakha ubumbano enhlanganweni ikakhulukazi njengoba kubhekwe okhethweni lukazwelonke.
Uthe bazohambela zonke izifundazwe njengoba sebeqale KwaZulu-Natal.
Ebuzwa mayelana nodaba lukaNdunankulu waseNorth West uMnuz Supra Mahumapelo, uMagashule uthe zisaqhubeka izingxoxo ngoMahumapelo.
Imithombo yeSolezwe ebingaphakathi emhlanganweni ithe umhlangano ubushubile njengoba bekukhona ukungavumelani ngodaba lwengqungquthela yesifundazwe.
Uthe maningi amagatsha athe asekulungele ukuya engqungqutheleni okwenze kwathathwa isinqumo sokuthi ibe ngaphambi kokuphela kukaMeyi.