Othisha babhikishele uthishanhloko
BAMISE ukufunda othisha besikole samabanga aphansi iThembalihle Primary, eMariannhill, babhikisha bekhala ngokungathuthuki kwesikole.
Izolo akufundwanga nhlobo kulesi sikole. Othisha bebebhikisha ngaphandle bephethe izingqwembe ebezigxibha uthishanhloko.
Ezinye zalezi zingqwembe bezibhalwe ukuthi: “Siphi isigungu esilawula isikole. Sisebenza nini. Ziphi izimali zesikole. Kwenzeka kanjani ukuthi uthishanhloko kube nguyena owengamele konke okuqondene nesikole?”
Omunye wothisha okhulume neSolezwe uthe izingane zifunda emagunjini amapulangwe zisebenzisa amatafula nezitulo okudala kanti nezinsizakusebenza ziyashoda.
Lo thisha ubuye wakhala ngokuthi uthishanhloko uyabanqabela ukuhlaba ikhefu.
Omunye owayemele iSadtu kulesi sikole uthe: “Kunezingane eziningi kakhulu. Zingaphezu kuka-1 500 okusenza singalawuleki kahle. Indlela esiphethwe ngayo ayigculisi neze njengoba intuthuko ingabonwa okubonakala ngokuthi kusenamathoyilethi amahlanu kuphela.”
Ikhansela lendawo, uMnuz Reginald Cloete, lithe bese lizwile ngezinkinga ezibhekene nalesi sikole kodwa lathi uma liyoxhumana nothishanhloko, wangalemukela kahle, walixosha.
“Into engenze ngasukumela lolu daba, ngithole ukuthi izingane zijikisiwe. Engikwaziyo wukuthi kunezinsolo ezibhekiswe kuthishanhloko zokuthi udla imali namanye amalungu esigungu esilawula isikole. Kuvela nokuthi amanye amalungu akhethwa ngo-2014, awakaze ashintshwe,” kuchaza uCloete.
Ethintwa uMnuz Justice Dlamini onguthishanhloko osolwa ngokungaphathi ngendlela, ucele ukuthi kukhulunywe nomhloli.
Okhulumela uMnyango wezeMfundo eKZN, uMnuz Kwazi Mthethwa, uthe ngokwazi komnyango isikole sinamalungu amasha esigungu esilawula isikole.
“Uma bengagculisekile ngokuqokwa kwesigungu esilawula isikole, kungakuhle bakhulume nomnyango. Njengomnyango siyakugxeka ukuphazamiseka kokufunda nodlame esikoleni,” kuphetha uMthethwa.