Akuphele ukunyanyalata kowezeMfundo
NGELEDLULE sibike ngesikole saseBhamshela iQalakahle High osekuphele inyanga kuphazamiseka ukufunda kuso ngenxa yokugcwala kwamatholiyethi asetshenziswa khona angomahamba nendlwane.
IQalakahle yayinamathoyilethi emigodi ngaphambi kokuthi avalwe wuMnyango wezeMfundo waletha angomahamba nendlwane.
Inkinga manje ngukuthi inkampani okufanele iwalande amathoyilethi uma esegcwele iyowathulula ayisakwenzi lokhu ikhala ngokungakhokhelwa. Nakuba uMnyango wezeMfundo wawuthi wenza okungcono ngamathoyilethi angomahamba nendlwane kodwa kuyahlupha kwakona ukuthi kusenezikole okufanele zisebenzise lolu hlobo lwamathoyilethi eNingizimu Afrika.
Ziningi izinselelo ezikhona ezikoleni futhi siyohlale sivuma ukuthi mukhulu umonakalo okudingeke uhulumeni we-ANC uwulungise ngoba izikole zabamnyama zazingahlinzekwa ngezidingo njengezezinye izinhlanga ngesikhathi sobandlululo.
Yize kunjalo, kuningi nokuxhashazwa kwemali okubonakala mihla namalanga eminyangweni kahulumeni okwenzeka kusukela kongqongqoshe kuzwelonke kuze kuyofika ezingeni likahulumeni wezasekhaya okukubambezela ezinye izinhlelo ngoba sekushoda imali.
Enye imali imoshwa ngokuthi kuthathwe imisebenzi inikwe abangayazi abagcina benze into engacacile ephoqa ukuthi kuphinde kukhishwe enye sekulungiswa kanti abanye osonkontileka abayiqedi kwakuyiqeda imisebenzi abayinikiwe.
Kuthiwa abasebenze kanjani othisha endaweni enjena? Abafundi bona kuthiwa abafunde kanjani? Yini bengacatshangelwa abazali abazogulelwa yizingane ngokuhlala endaweni enamathoyilethi angcolile?
Ukuhlinzeka ingqalasizinda yezikole akuwona umsebenzi woMnyango wezeMfundo kuphela kodwa kubanjiswana noMnyango wezeMisebenzi kahulumeni.
Abazali izingane bazishiya esandleni soMnyango wezeMfundo uma sezisesikoleni. Lokhu okwenzeka eQalakahle kusho ukuthi uMnyango wezeMfundo ubenzele phansi abazali.
Uhulumeni we-ANC uzomshaya nini unembeza ukhathalele imfundo yengane yomuntu omnyama usukume hhayi ukuthi ugcine icala?