Ngiphoxwe yiJaji kolombango welamaNazaretha
MHLELI: Ngicela ungiphe isikhala kwelakho lodumo ngedlulise indumalo yami ngengikuzwe kushiwo yinkosi yeNkantolo iJaji u-Isaac Madondo eNkantolo eNkulu yaseMgungundlovu ngeledlule esinqumeni sakhe sokwedluliswa kwecala lombango wobuholi bebandla lamaNazaretha ohlangothini lwaseBuhleni nolwaseThembezinhle.
IJaji likhulume okuningi okungelona iqiniso engingekeke ngangena kukho kodwa ngizolicaphuna kokubili.
Okokuqala lithe liyakholelwa ekutheni inkosi yamaQadi uThingo lwayitshela ukuthi emuva kwalo kuzohola uNyazi.
Sisalalele lokho lithe incwadi yabhalwa yilo futhi uThingo luqoka Imisebeyelanga. Indidake nansi, kusho ukuthi uThingo lwagcoba abantu ababili ukuba bahole ibandla elilodwa. Mina angifundisiwe nje kwezomthetho kodwa ngiyabona ukuthi kulezi zimemezelo ezimbili ezenziwa kutshalwa uThingo kukhona esingamanga.
Siyawabonga-ke amajaji amabili iJaji uMnguni neJaji uDlwathi ngokumela iqiniso ngale kokuchema. Okwesibili iJaji uMadondo lithe umuzi waseBuhleni oweNyangayezulu akuwona owebandla ngoba iNyangayezulu yabekwa yinkosi endala yamaQadi lokho okungelona iqiniso.
Umuzi waseBuhleni wabekeka ngokufika kukamama oyiSayoni eNyangeniyezulu wathi uthunywe ubaba iLanga lathi akahambe ayokwakha umuzi kaNkulunkulu laphaya ekhomba ehlathini eBuhleni.
Kwaziswa inkosi yesizwe ngale ndaba yabe isithi ngeke iphikise uNkulunkulu akwakhiwe hhayi ukuthi yavele yasuka nje yayobeka iNyangayezulu.
INyangayezulu yayingadinge kubekwa ngoba yayinomuzi wayo omuhle eNanda okuthiwa yiseNgqayizivele. Angikuyeke-ke okomuzi waseKuphakameni elithe iJaji nakuwo uMqaliwendlela wabekwa yinkosi yamaQadi. Lithe futhi leli ibandla lamaNazaretha elesintu. Uyihlazo lo mlando weJaji ngoba wedukisa izingane. Kusobala ukuthi alilwenzanga ucwaningo olwanele ngaphambi kokukhuluma le nto elayikhuluma. Dumisani Mgabhazi EMPANGENI