UKadodia ubabaza amava oweMaritzburg United

USIHLALO weMaritzburg United, uFarook Kadodia, akawuvali umlomo ngamava omqeqeshi weqembu uFadlu Davids.

Lo mqeqeshi owazakhela igama kwiTeam of Choice ngokuqhulula amagoli amqoka uthathe izintambo zokuqeqesha ekuqaleni kwesizini. Ngesizini edlule ubambe izintambo ngasekupheleni kwayo ngemuva kokuthi iqembu lihlukane noRoger de Sa.

Ekuqaleni kwesizini ugixabezwe ngenkontileka yeminyaka emine. UDavids, odabuka eKapa, ugabe ngeziqu zokuqeqesha ze-Uefa B Level azilande e-Ireland ngo-2015 eseyiphini lika-Ernst Middendorp. Selokhu ethathe lo msebenzi ushaya into ecokeme.

Kwi-MTN 8 ufinyelele kowandulela owamanqamu kanti manje iqembu lihlezi endaweni yesithathu kwi-log. Ngempelasonto uqophe umlando efaka iTeam of Choice okokuqala kowamanqamu eshaya iMamelodi Sundowns ngo 3-1 eHarry Gwala Stadium, eMgungundlovu.

“Indlela uFadlu ahlelela ngayo imidlalo yeqembu ingukhiye ekutheni sikhiqize lolu hlobo lwekhono esinalo njengamanje. Abafana abancane abathola ithuba bebengeke balithole ngaphandle kwakhe. Umsebenzi wakhe uyawuthanda. Ubuhlakani bakhe buwukhiye empumelelweni yeqembu. Uhlanganise abadlali abasathuka isisinga nasebemnkatshubomvu,” kusho uKadodia.

UKadodia uveze ukuthi ngesikhathi iqembu liqhuba imidlalo eyisishiyagalombili lingawini kukhona abese bethi kungani engamshintshi umqeqeshi.

“Uma izinto zihamba kahle asikho isidingo sokushintsha (abaqeqeshi). Ngakho besingekho isidingo sokuphumela ngaphandle siyofuna omunye umqeqeshi. Yebo sike sabhinjelwa yizinto ngomzuliswano wokuqala. Ngaleso sikhathi wonke umuntu wayethukile. Ngangithola izingcingo zingibuza ukuthi ngisaneme yini ngomqeqeshi? Besiwubona umsebenzi abewenza. Isizini yethu ishintshe ngemuva kokuhlula iCape Town City KwaMashu. Ngemuva kwalokho asikaze sibheke emuva,” kusho uKadodia obeneme.

Kulo mdlalo ezikaDavids zabuya zikade zilandela ngemuva zagcina ziwine ngo 4-2 emdlalweni weligi.

“Kusukela lapho asikaze sibheke emuva, yize bekukhona lapho besiqhuzuka khona,” kuphetha uKadodia.