UDavids ukhalime abadlali emuva kokushaya iSundowns
UKHALIME abadlali ukuthi bajabule babuye nganeno umqeqeshi weMaritzburg United, uFadlu Davids, ngemuva kokuqopha umlando befaka iqembu okokuqala kowamanqamu womkhumulajezi.
I-United ibhaxabule iMamelodi Sundowns ngo 3-1 emdlalweni owandulela owamanqamu weNedbank Cup ngempelasonto eHarry Gwala Stadium, eMgungundlovu.
Amagoli ashaywe wuLebohang Maboe, Mxolisi Kunene noFurtune Makaringe.
ITeam of Choice izobhekana neFree State Stars kowamanqamu weNedbank Cup eCape Town Stadium ngoMeyi 19. Leli qembu laseMphithi lizobe lilwela isicoco salo sokuqala selokhu laqala ukudlala kwiPremiership ngo-2005.
“Ngiyaziqhenya ngabadlali bami kodwa okwamanje ngeke sikwazi ukuqala sijabule. Sinomdlalo ngoLwesithathu (kusasa) nangoMgqibelo. Angifuni ukuthi bahambe baye emakilabhini bayozijuxuza. Bazojabula khona lapha egunjini lokushintshela bese beyolala ngoba sinemidlalo emqoka. Kuzomele kusasa (izolo) siyolungiselela umdlalo weSundowns,” kusho uDavids.
Kusasa i-United izodlala neSundowns kowe-Absa Premiership. Lo mdlalo ubaluleke kuwona womabili amaqembu. ISundowns izobe ilwela ukuqinisa indawo yayo esicongweni kanti ne-United iyawadinga amaphuzu ukuze ingagudluki endaweni yesithathu ezobafaka kwiCAF Confederation Cup.
UFadlu uthe njengoba bebezibekele umgomo wokungena kowamanqamu nakanjani, bazimisele ukulwela ukubuya nayo indebe KwaZulu-Natal. “Sizokwenza konke okusemandleni ukubuya nayo indebe. Kodwa okwamanje kumele sibhekane nomdlalo ngamunye. Sisenemidlalo emithathu kwiligi okumele sithole kuyona imiphumela,” kusho uDavids.
NgoMgqibelo ezikaDavids zizovakashela iKaizer Chiefs eFNB Stadium ababanga nayo indawo yesithathu kwi-log njengoba bebambene ngamaphuzu angu-42.
UDavids uthe kufanele basebenze, bangabuswa wumphumela abawuthole kwiSundowns. Ugcizelele ukuthi akumele bayibukele phansi iStars abazodlala nayo kowamanqamu.
“Bayiqembu elikhulu nabo, indawo abahleli kuyona kwi-log iyakufakazela lokho. Akufanele siqale sijabule manje ngoba nakhu sishaye iSundowns. Ngesiwombe sesibili bese bengasaphelele kodwa bebesakwazi ukuphatha ibhola kwezinye izindawo. Yonke imidlalo esiya kuyona kumele siyithathe njengokuthi siyobhekana neqembu elikhulu,” kusho uDavids.