UMabedi uzoqeqesha iChiefs okwesikhashana
UPATRICK Mabedi useqokwe yiKaizer Chiefs ukuthi aqedele imidlalo emithathu esele njengomqeqeshi waMakhosi ngaphambi kokuthi kusongwe isizini ka-2017/2018.
Lokhu kuqinisekiswe iyona iChiefs esitatimendeni esithumele izolo. UMabedi uzongena endaweni kaSteve Komphela osule isigubhukane ngemuva kokushaywa kweChiefs emdlalweni weNedbank Cup eMoses Mabhida Stadium ngoMgqibelo ebusuku.
UKomphela uphoqelekile ukuthi ashiye umsebenzi ingakapheli isizini ngoba abalandeli bese bengayizwa indaba yakhe. UMabedi waseMalawi udlalele iChiefs kusuka ngo-1998 kwaze kwaba u-2006. Wayengukaputeni ngesikhathi iChiefs iwina isicoco seligi ngo2004 nango-2005 kanti wayekhona nangesikhathi Amakhosi ewina isicoco seCAF i-Africa Cup Winners’ Cup ngo-2001.
UMabedi (44) ubuyele kwiChiefs njengephini likaKomphela ekuqaleni kwesizini ngemuva kokubamba izintambo njengomqeqeshi weCape Town All Stars egijima kwiNational First Division. Emidlalweni emithathu ezodlalwa yiChiefs uzolekelelwa ngu-Arthur Zwane opheka iqembu leChiefs elidlala kwiMultichoice Diski Challenge (MDC).
UZwane ujoyine Amakhosi ngo-2000 waze wagaxa amakhokho akhe emgibeni ngo-2010. Ngokusho kweChiefs isiqalile ukuthungatha umqeqeshi omusha ozocija iqembu ngesizini ezayo. Phakathi kwabaqeqeshi abakhonjwa eNaturena kukhona uLuc Eymael weFree State Stars owenze uKomphela wabona eza ngayo ngokushaya iChiefs ngo 2-0 eMoses Mabhida ngempelasonto.
Namuhla iChiefs izobhekana neLamontville Golden Arrows emdlalweni we-Absa Premiership ePrincess Magogo Stadium, KwaMashu. Akwaziwa ukuthi uMabedi uzoqalisa baphi abadlali beChiefs ezingayihambeli kahle izinto.
IChiefs isizolwela ukuqeda endaweni yesithathu kwi-log okuzokwenza izibekisele indawo yokudlala kwiCAF Confederation Cup ngonyaka ozayo.