UPitso ukusula kukaKomphela
yamemezela ukuthi useyasishiya isigqiki sakhe sokucija iChiefs.
UMosimane exoxa nabezindaba ngemuva kokushaywa kwezakhe kwi-semi final yeNedbank Cup eHarry Gwala Stadium, eMgungundlovu ngempelasonto, uthe udumele ngokusula kukaKomphela.
“Yebo, ngidumele (ngokuthi uSteve usezibeka phansi izintambo kwiChiefs), ngidumele kakhulu. Ungumuntu oqinile. Uyindoda ekhulile. Uyindoda eqotho. Ngidumele ngokulahlekelwa ngomunye wethu (thina baqeqeshi abamnyama). Akumnandi. Ngiyayiqonda indlela aphendula ngayo uLuc (Eymael weFree State Stars osolwa ngokufuna umsebenzi wokucija iChiefs). Mhlawumbe mina ngangizophendula ngendlela engaphezu kweyakhe. Ekugcinenike imigomo yokuziphatha abayazi abanye abaqeqeshi. Ngifuna ukucija iChiefs futhi ngizokwenza konke okusemandleni ami (eqonde uLuc). Yebo, kunjalo-ke. Ngiyayiqonda indlela azizwa ngayo uKomphela,” kusho uMosimane.
Inkontileka kaKomphela neChiefs ibivele iphela ngoJuni. Kumasizini amathathu uhluleke wancama wukulethela iqembu isicoco okuyinto engajwayelekile kwiChiefs.
“USteve yindoda ekhulile. Uyazi naye ukuthi ukuba uyinqobile iNedbank Cup mhlawumbe bebengeke vele bambuyise,” kusho uMosimane.
UKomphela noMosimane basebenze ndawonye kwiBafana Bafana ngesikhathi uMosimane esengumqeqeshi weqembu lesizwe. Bobabili futhi badlalile kwiBafana.
UMosimane uthe akahambisani nhlobo nesenzo sabalandeli beChiefs sokulimaza inkundla nokushaya onogada.
“Umfana wami ubelapha (eMgungundlovu). Ngike ngazibuza ukuthi kuphephile yini ukuthi eze nabangani bakhe. Sekuphenduke isiko lokhu (ubudlova babalandeli). Kodwa kungathiwani ke, mhlawumbe nami ngelinye ilanga bayongihlasela lapha kwiSundowns,” kusho uMosimane.