‘Bonke abadlali abashaye amagoli’
UMQEQESHI weSuperSport United, uKaitano Tembo, uphonsele inselelo abadlali beqembu ukuthi bonke kube wumsebenzi wabo ukushaya amagoli ukuze badlule esimeni ababhekene naso.
ISuperSport ikhishwe emqhudelwaneni iCAF Confederation Cup yiGor Mahia yaseKenya eLucas Moripe Stadium, ePitoli, ngoLwesithathu olwedlule. Amatsatsantsa awine umdlalo ngo 2-1 kodwa iGor Mahia yadlulela esigabeni samaqoqo ngenxa yokuthi ishaye igoli ekuhambeni nokwenze ukuthi kugcine kuwu 2-2 uma sekuhlanganiswa imilenze yomibili.
Amagoli eSuperSport kube wumkhonto ogwaze ekhaya wezivakashi kwathi elinye lashaywa nguThabo Mnyamane osephenduke ithemba leqembu ekushayweni kwamagoli. ISuperSport iwatholile amathuba okwehlula iGor Mahia ebikade ihaqwe yizinkinga ezicishe zaholela ekutheni ingafiki eMzansi kodwa yahluleka ukuwasebenzisa. Ibikade iphumuze inqwaba yabadlali abajwayele ukubonakala okukhona kubona uRenielwe Letsholonyane, Thuso Phala, Siyabonga Nhlapo, Clayton Daniels nabanye.
UTembo, osabambe izintambo kwiSuperSport, uzwakalise ukuphoxeka ngokukhishwa kwabo kwiConfederation Cup.
“Ngiphoxekile ngomphumela ngoba ngicabanga ukuthi sidlale kangcono kakhulu. Emuva kokushintsha sidlale ngabadlali abathathu emuva, sakha amathuba amaningi. Besidinga inhlanhla encane ukushaya amagoli angaphezu kwamabili. Abadlali abasebancane bazofunda emaphutheni abo, abafundi ngokuhlala ebhentshini kodwa kudingeka banikwe ithuba ngoba lokho kuyingxenye yokukhula kwabo,” kusho uTembo.
ISuperSport ihlalelwe yijoka lokuzikhipha engcupheni yezembe kwi-Absa Premiership ngoba ibalwa namaqembu angase azithole esegijima kwiNational First Division (NFD) ngesizini ezayo. Isendaweni ka-14 kwi-log yePremiership. Kungenzeka ukuthi yisona lesi simo esiphoqe iSuperSport ukuthi iphonse abafana abancane koweCAF ukuze abanamava balungele umdlalo onzima weligi neFree State Stars eLucas Moripe Stadium kusasa ebusuku.
“Noma ngabe sidlulele phambili kwiCAF lo mdlalo ubungeke usiphazamise koweligi ngoLwesithathu. Sizoba nabadlali abaphumulile ngoLwesithathu. Kuhlale kubalulekile ukwenza kahle ngaphambi komdlalo obalulekile nakuba singadlulelanga phambili. Kodwa umdlalo uzosinika ukuzethemba,” kusho uTembo.
“Kuhle ukuthi sishaye amagoli amabili kodwa lokho akusizi ngoba ashaywa ngumdlali oyedwa. Sidinga nabanye abadlali ukuthi bashaye amagoli. Lokhu kufanele kube wumsebenzi weqembu lonke, hhayi amagoli aqhamuke kumdlali oyedwa. Sinabadlali abangasishayela amagoli abafana no-Aubrey Modiba noThabo Mokoena. Kuhlale kunzima uma abadlali abajwayele ukushayela iqembu amagoli bebhokelwe yisomiso.”