Imigomo ekhuthaza omama ukuncelisa ubisi lwebele
INHLANGANO yezempilo emhlabeni wonke, iWorld Health Organisation (WHO), ne-United Nations International Children’s Fund (UNICEF) sebekhiphe imigomo emisha yokugqugquzela ukunceliswa kwezingane ubisi lwebele ezikhungweni zezempilo.
Ngokwezibalo zakamuva, kukholakala ukuthi ukuncelisa ingane ubisi lwebele izelwe ize ihlanganise iminyaka emibili kusindisa izingane ezineminyaka engaphansi kwemihlanu ezilinganiselwa ku-820 000 njalo ngonyaka.
Le migomo ekhishiwe ihambisana nohlelo olwethulwe ngo-1991 olukhuthaza ukuthi izibhedlela zigxile ekuqinisekiseni ukuphepha kwezingane ezincane. Lokhu kuncike ekulandeleni imigomo ekhuthaza omama ukuthi bancelise izingane.
Ukuncelisa izingane ubisi lwebele kusiza ngokuzivikela ekutheni zingangenwa yizifo namagciwane. Izingane ezisanda kuzalwa zisengozini enkulu yokungenwa yizifo nokukhishwa yisisu uma zinganceliswa ubisi lwebele noma zinikwa ubisi lwebele bese ziphinde zinikwe olwethini nezinye izinhlobo zokudla. Sekubikwe kaningi phambilini ukuthi ukuncelisa ibele kuphinde kuvikele omama bangangenwa wumdlavuza webele.
Umqondisi jikelele we-UNICEF, uNkk Henrietta Fore, uthe ukuncelisa ibele kuvikela impilo yezingane.
“Imiphumela yokuncela ibele ize ibe nomthelela esimeni sempilo yezingane noma sezikhulile. Ukuncelisa kudinga ukuthi omama basekwe futhi bagqugquzelwe ukuze bakwenze ngendlela. Uma imigomo yokuncelisa ibele ilandelwa ngendlela kungasiza ekutheni kunyuke izibalo zomama abancelisayo emhlabeni wonke kuphinde kuvikele isimo sempilo yezingane,” kusho uNkk Fore.
Umqondisi jikelele weWHO, uDkt Tedros Ghebreyesus, uthe emazweni amaningi ukunceliswa kwengane ubisi lwebele kunomthelela ekutheni izophila yini noma izoshona incane, nokuthi uma iphilile izokhula ngendlela yini.
“Izibhedlela akuzona ezokwelapha abantu abagulayo kuphela. Zikhona ukuze zigqugquzele abantu ukuthi banakekele impilo yabo,” kusho uDkt Ghebreyesus.
Imigomo yakamuva igqugquzela izindlela ezilula ezingenza omama bancelise izingane ubisi lwebele zizalwa kuze kube ziyakhula. Ichaza ukuthi abasebenzi bezempilo bangenza kanjani ukuqinisekisa ukuthi bayayilandela imigomo ekhona yokunakekela omama abasanda kubeletha nezingane ezisanda kuzalwa.