Kuyingozi ukuphunduleka kokusebenza kwenhliziyo
KUYIHLAZO ukubona abantu bakithi begula kakhulu baze bashone ngenxa yesifo esizungeza ezintweni ezintathu:
Ukunqanyukelwa wumoya kube nzima ukuphefumula ukukhathala, umzimba uphelelwe ngamandla nesiyezi.
Ngokubona kwami izizathu ezenza sigcine siye kwagoqanyawo ziyehlukahluka; kunalabo abagula baze balimale:
Ngenxa yokuswela ulwazi oluyilo nolwanele,
Kube nalabo abanenkani, abangafuni ukutshelwa,
Bakhona nalabo abagula baze bashone ngenxa yenkolelo ebenza bangakuboni okunye okunokubasiza ngaphandle kwalokhu abakholelwa kukho.
Bese kuba nalabo abaqoma ukugula, ukufa kudlondlobale impela kubo, ngoba kunzima ukukhipha imali ukuze bathole usizo oluzobayisa phambili. Lapha uyaye uthole ukuthi uma umuntu ezokhipha imali kudokotela, kuba nzima satshe; sengathi udokotela angavele amelaphe bhusende nje, okungenjalo aqome ukufa nokufa. Bakhona kakhulu abantu bakithi abacabanga futhi benze ngale ndlela.
Ngicela ke sibuyele kuleziya zimpawu eziwukunqanyukelwa wumoya, wukukhathala kuphele amandla nesiyezi. Izimpawu lezi zingabangwa yizimo nezifo ezehlukene kodwa kwesikubonayo nsuku zonke imbangela kuba wukuphunduleka kokusebenza kwenhliziyo. Lapha ngikhuluma ngenhliziyo ephelelwa ngamandla okwenza umsebenzi wayo igcine isihluleka ukuphaka igazi elanele nelidingwa yiminxa eyehlukene yomzimba. Umsebenzi wenhliziyo ukwemukela igazi eselingcolile elisuka emzimbeni, yona ilithathe ilidlulisele emaphashini liyohlanzwa, ligezwe. Iphinde inhliziyo yemukele igazi eselihlanziwe lisuka emaphashini. Kungumsebenzi wayo futhi inhliziyo ukuthatha leli gazi eseligeziwe nelinamamdla ilihambise ngokuliphakela ezindaweni ezahlukene zomzimba.
Inhliziyo njalo uma ishaya isuke iphaka igazi elihlanjiwe ilisa emzimbeni, iphinde yemukele elingcolile ilihambise emaphashini liyogezwa njengoba bese sishilo ngenhla. Kuyaye kuthi uma kukhona okuphazamisa ukwenzeka kwalo msebenzi, bese lokhu kugcina kubangele lezi zimpawu esesikhulume ngazo.
Uma inhliziyo seyehluleka ukuphaka amalitha ayisihlanu uma ishaya, lokhu kungabanga isiyezi ngoba ubuchopho abusawutholi loya mmumatho odingwa ubuchopho, kwabanye kungagcina esephathwa yikhanda nokukhohlwa kulandele. Umsebenzi wegazi elihlanziwe wukwenza kube khona amandla ezicutshini nasemzimbeni wonke. Uyabona yini ukuthi uma leli gazi liphuma lingaseneli, azoya ngokuncipha la mandla umzimba uhlale ukhathele. Inhliziyo esiphelelwe ngamandla okukhipha igazi, kugcina ekuphakeleni kwayo ingakwazi ukulikhipha lonke igazi kuyo inhliziyo, lokhu okuholela ekutheni igazi lilokhu libhajwa enhliziyweni bese iyakhukhumala; lokhu kuvele kuholele ekubhajweni kwegazi emaphashini ngoba phela alisakwazi ukungena lonke enhliziyweni ngenxa yaleliya ebelisalele. Amaphaphu anamadamu egazi adala ukuthi amaphaphu asindane, umoya ungaguduzi kahle bese kuba nzima ukuphefumula, umoya unqamuke, ucinane, uhefuzele, ukhwehlele into engapheli, ukuvuvukala kusuka kwesingezansi ezinyaweni kunyuke nomlenze.
Okunye okubalulekile okulandela ukungaphakwa kwegazi elanele inhliziyo:
Ukushoda kwegazi eliya ezinsweni. Izinso zingagcina zilimala kakhulu zifa nokufa ukusebenza. Lokhu kwenzeka kancane kancane. Yile nto edida abantu ngoba usuke ezazi engumqemane kanti uselimele kakhulu ngaphakathi. Lapha kungaba nobuhlungu obungabekezeleki ezinhlangothini, ukhathale, uhlanze, uphelelwe nayigazi futhi ungazibona ulokhu ungenwa yizifo kalula. Ukufa kwezinso kungasho ukuphela kwempilo kuwe okanye uma unenhlanhla ugcine usuphila ngemishini ehluza igazi ikhiphe udoti ezinsweni.
Ubuhlungu bamalunga emzimbeni okungaba amadolo, amaqakala, amanyonga, iqolo, amahlombe, izingalo, izinyawo nokunye. Ukushoda kokuphakwa kwegazi kuholela ekomeni, nokukhandleka kwamaxhwala kulezi zindawo ezishodelwayo. Izindawo ezingamalunga zidinga igazi elinamandla elizokwenza ilunga lelo lisebenze ngokuxhumana nomzimba wonke. Uma sekuphakwe kwashoda, maye ubuhlungu obuzolandela. Isimanga uyaye uthole kokunye lapha ukuthi kuthiwe usuphethwe ngamathambo, usuyohlala koBrufen nakoTramadol uyoze uyongena egodini. La mathambo avele ashiwo ngaphandle kokufuna imbangela nomnyobo wobuhlungu belunga lelo. Yinselelo enkulu le abantu bakithi ababhekene nayo imihla namalanga!
Muzi wakithi asiyeke ukuba nenkani singasukumi uma sizwa ukukhathala komzimba, isiyezi nokunqamuka komoya uma siphefumula, ukuphelelwa ngamandla. Kuyasiphoqa ukusukuma thina sonke:
Esibakhulu ngomzimba, noma izimpawu zingekho zihlole kudokotela wenze i-ECG
Esisebenzisa amaphilisi eBP nakashukela siyaphoqeka ukucela odokotela bethu basihlole nge-ECG. Sonke esinezihlobo ezigula ngale ndlela ngoba lezi zifo ziwufuzo asingalindi amathonsi abanzi hleze sizisole! Mpilonde!