UKhoza uphonsele amaqembu inselelo
USIHLALO wePremier Soccer League (PSL), u-Irvin Khoza, uphonsele amaqembu inselelo yokuthi abhukule ukwenza izinkundla izindawo eziphephile kubalandeli.
UKhoza ubekhuluma esithangamini nabezindaba emahhovisi ePSL, eGauteng, izolo, emva kwesigigaba esenzeke eMoses Mabhida Stadium, eThekwini, ngempelasonto. Kulimale abalandeli abangaphezu kuka-10 kwacekelwa nenkundla ngesikhathi abanye betheleka enkundleni emuva komdlalo owandulela owamanqamu weNedbank Cup phakathi kweKaizer Chiefs neFree State Stars. Amakhosi aguqe ngo 2-0.
UKhoza uqale ngokuxolisa kubona bonke abalimele, abaxhasi nabamathelevishini abalinyalelwe yimpahla yabo kule sigameko.
“Umthetho uyasho ukuthi emidlalweni ekuleli qophelo kufanele kwandiswe isibalo samaphoyisa ngoba aqeqeshiwe ukubhekana nodlame nezinxushunxushu. Umkhuzi wamaphoyisa uyena okufanele akhiphe umuntu onesikhundla esiphezulu ukuze abe khona emihlanganweni yokuhlela umdlalo. Okuvelile wukuthi ngaphambi komdlalo wangoMgqibelo, owayethunyiwe wayengekho emhlanganweni wokuqala wokuhlela kodwa ufike kulowo wokwenza obekuhleliwe. Uyenza kanjani into eyahlelwa ungekho? Angisho ukuthi ngigxeka amaphoyisa. Lezi yizinkinga esibhekana nazo kodwa okuhle wukuthi sinoNgqongqoshe ovulelekile, besivele sikhuluma naye ngalezi zinto,” kusho uKhoza.
“Isehlakalo sangoMgqibelo besihleliwe. Ezinkundleni zokuxhumana kade besho ukuthi “Nina eGoli anenzanga lutho, thina eThekwini sizolungisa”. Amaqembu kufanele athole abantu abanolwazi abazobhekela ezokuphepha nezingozi hhayi ukuthi kuthathwe umuntu ngoba ubekade eyiphoyisa. Umehluko mkhulu kakhulu. Lokhu kubalulekile ngoba amaphoyisa asuke engekho emidlalweni ethathwa njengemincane. Nalapho izinto ezifana nalezi zingenzeka. Sizoba nenkundla yokucobelelana namaqembu ngoMeyi 16 kuya ku-20, ngoJuni nangoJulayi.”
Kwenzeka lokhu nje, iChiefs ngesonto eledlule ihlawuliswe isizumbulu sika-R250 000, yalengiselwa u-R200 000 ngesenzo esifanayo ngemuva komdlalo wayo we-Absa Premiership neChippa United eFNB Stadium emasontweni edlule.
UKhoza uthe sekuyisikhathi sokuthi abantu bajeze ngezenzo zobudlova ezinkundleni zakuleli.
“Ngiyakuqonda ukuthi akubona bonke abalandeli abenza lezi zinto, iningi lisuke lizozijabulela. Senza konke okusemandleni ukufinyelela emnyombeni wokwenzekile. Izinhlaka ezahlukene zisahambisa imibiko. Abantu kufanele bajeze ngezenzo zabo. Umthetho ukhona, kungani bengaboshwa? Ngiyazi ukuthi abantu bafaka imizwa yabo ebholeni futhi bafuna ukuthi amaqembu abo awine izindebe. Kodwa nawo amaqembu enza konke ukuze abalandeli bawo bajabule,” kusho uKhoza.
Uveze ukuthi enye inkampani enkulu engabaxhasi bePSL ithe izozithwala izindleko zokwelapha abalimele, wakuqinisekisa ukuthi akekho oshonile.