Usekwi-Universal Music owegqom’
UBESHELWA yizinkampani ezimbili ezinkulu zomculo, umculi wegqom’ waseThekwini obe ngowokuqala wegqom’ wesifazane ukusayina ne-Universal Music.
UThandeka “TDK Macassette” Mkhwanazi (26) waseGlenwood, eThekwini, umenyezelwe ngesonto eledlule njengomunye wabaculi balesi sikhondlakhondla senkampani.
“Kukhona nenye engingeke ngiyidalule igama layo ebeyingifuna kodwa ngakhetha i-Universal ngoba ngibona ngathi iza nokungcono,” kusho uTDK.
Lo mculi uqale ukugqama ngengoma ethi, Goosheshe apikwe kuyo noSjava wuDJ Maphorisa noDJ Buckz.
Ngemuva kwalokho ukhiphe ezinye, Ikorobela Le Walk. “Okwamanje ngeke ngikwazi ukusho ukuthi ngizokhipha nini i-albhamu kodwa kuzoba yikulo nyaka. Ngilungiselela ukukhipha izingoma ezihamba ngazodwa futhi neNayi kukhona engisebenza kuyo no-Okmalumkoolkat. Abantu abalindele,” kusho uTDK. Uthe ngumusa kaNkulunkulu ombeke lapho ekhona kanjalo nokukholelwa kwakwenzayo. “Ngibone sengathi eThekwini angisekwa ngendlela eyanelisayo ngaphandle kukaDJ Cndo nabahleli bemicimbini abangiqashayo. Izinkampani bezinganginakile kwaze kwaba ngibonwa ngezangaphandle. Ngiyakholelwa kwengikwenzayo futhi akukho okungangivimba,” kuchaza uTDK. Uthe umculo wakhe uzoshintsha inkolelo yokuthi iGqom’ wumculo wabantu baselokishini kuphela ngoba yena akaze ahlale elokishini. Uthe umculo wakhe uhlanganisa amatemu athandwa ezindaweni zobumnandi kodwa wonke umuntu angakwazi ukuwulalela. Uthe akaze azibone njengomculi yize akhula edansa i-hip hop. “Ngiwusomabhizinisi ohlela imicimbi kodwa nginothando lwezokungcebeleka. Angikaze ngizibone ukuthi nginethalente. Kwaba wuMaphorisa nje owangizwisa ingoma ngabe sengicula ngizidlalela wathi asingene estudiyo.”