Usewagaxa emgibeni uHabana
UMUHAMMAD ALi wake wathi ‘uma untweza emkhathini ngebhanoyi, ngisho ungalimisa noma yikuphi nezwe ubuze ukuthi ngubani uMahamed Ali abantu oyobuza kubo bayokutshela ngami.’
Cishe yisimo esithi asifane nakuBryan Habana, inkakha yamaBhokobhoko ememezele izolo ezinkundleni zokuxhumana ukuthi isiwagaxa emgibeni amakhokho ayo.
Noma engefaniswe nengqwele yesibhakela engu-Ali (ongasekho) kodwa zincane kakhulu, uma zikhona, izindawo eNingizimu Afrika othi uma ukhuluma khona ngombhoxo kuvele ukuthi uHabana akaziwa. Nayizolo ngesikhathi le nsephe iveza ukuthi isithi khumu, bancane abantu ababe nokudideka ukuthi kukhulunywa ngobani kwazise nguHabana owaqhulula ama-try anqobisa amaBhokobhoko iWebb Ellis (isicoco somhlaba) eFrance ngo-2007.
UHabana (34) uwagaxa amakhokho akhe ephethe amarekhodi ambalwa amqoka embhoxweni waseNingizimu Afrika;
Yiyo insephe yaseGoli ephethe irekhodi lama-try amaningi kumaBhokobhoko emidlalweni yamazwe ngawu-67 ewashaye phakathi kuka-2004 no-2016.
Nguye onama-try amaningi, ngawu38, awashaye ngaphandle kwezwe lakhe ukwedlula bonke abanye abadlali emlandweni wombhoxo emhlabeni.
Le nsizwa isendaweni yesibili kubadlali asebedlalele amaBhokobhoko kakhulu. Inemidlalo engu-124 nokuyibeka ngemuva kukaVictor Matfield, obeyihola inqoba iSuper Rugby kwiBulls.
Uqale wabhala kwi-Instagram uHabana ngaphambi kokuyisa kwi-Twitter isimemezelo sakhe sokuwagaxa emgibeni nokuyilapho eqinisekise khona ukuthi uphoqwa wukulimala kulesi sinqumo.
“Sekuyisikhathi sami sokubonga. Umzuzu ongabalekeleki usufike qathatha futhi ngiwamukele, sengozishayela isiphuzo,” uHabana endlalela isimemezelo sakhe.
“Sekuphele isikhathi esingaphezu konyaka ngihlalele ethembeni, ngiphusha, ngizinikela ekubuyeleni enkundleni okokugcina, ukuthola lowo muzwa wokuhlabana.
“Ukuzwa inhlokomo yabalandeli noma ukuhlwitha iphilisi (ibhola lombhoxo) emoyeni. Ukungena ngendluzula endodeni noma ukushaya leyo try yokugcina yokunqoba umdlalo. Kodwa ngeshwa ngeke kusenzeka.
“Nami, njengeningi, bengingajabula ukuthi impilo yami yokudlala iphele ngenye indlela kodwa kwesinye isikhathi izinto azihambi ngendlela esithanda ngayo. Ngakho ekupheleni kwesizini, yisikhathi sokuthi ngivalelise ngibonge emdlalweni engiwuthanda kakhulu.”
UHabana ugcine ukudlala kwiToulon yaseFrance nayijoyine ngo-2014 esuka kwiStormers. IToulon uyisize yanqoba i-European Cup kabili, ngo-2014 nango-2015. Ngawo u-2014 uphinde wayisiza yanqoba iFrench Top 14.
Sekuphele izinyanga ezingu-12 enesa idolo okuyilo elimyekisa ukudlala.
ISuper Rugby uyinqobe kabili neBlue Bulls. Okunye ngoHabana: Ngo-2005, 2007 nango-2012 uqokwe njengeSARU Player of The Year.
Ngo-2007 nango-2012 uhlabane ngeSuperSport Try of the Year.
Ngo-2007 i-International Rugby Board imklomelise nge-IRB Player of The Year kwathi i-International Rugby Player’s Association yamnika umklomelo we-Try of the Year ngo-2012.