Mina ngilawulwa umthetho wezwe: Mogoeng
“NGILAWULWA wuMthethosisekelo waseNingizimu Afrika ukuvikela abantu kwabaphula umthetho.”
Isho kanje inhloko yamaJaji, uChief Justice Mogoeng Mogoeng, ibuzwa ukuthi yayingesabi yini ukumemezela ukuthi owayengumengameli wezwe, uMnuz Jacob Zuma, uphule uMthethosisekelo.
UMogoeng utshele osomabhizinisi nezifundiswa emcimbini obuhlelwe yi-Absa neNyuvesi yaKwaZulu-Natal obuseCountry Club ngoLwesibili ukuthi akazwani nabaphula umthetho angamane afe kunokuthi ababukele bacanase.
“Ngiyamhlonipha kakhulu obengumengameli wezwe, uMnuz Jacob Zuma. Angizange ngimemezele ukuthi uphule uMthethosisekelo ngoba ngimzonda noma ngifuna ukulandelwa ngabezindaba. Ngamemezela lokhu ngoba ngithembeke kuMthethosisekelo. Angizondi muntu futhi noMengameli Cyril Ramaphosa ngimtshelile ukuthi ngeke ngimvune uma umthetho umlahla,” kusho uMogoeng.
Uthe akanayo inzondo kodwa unomoya wobumbano ngoba ufuna abantu baseNingizimu Afrika babumbane ukuze baxazulule izinkinga zomhlaba, ezokukhishwa kwabathile inyumbazane kwezomnotho nesihlava sokucwasana.
Uphinde wakhala ngokuthandana kwezingane nabadala wathi lo mkhuba uyingozi.
“Izingane ezino-21 zithandana nabantu abaneminyaka ewu-60. Kufanele siwukhuze lo mhlola wo-sugar mama no-sugar daddy. Uma singawukhuzi kusho ukuthi iNingizimu Afrika ayinalo ikusasa,” kusho uMogoeng.
Udonse ngendlebe izintatheli ukuthi zibike ngenkohlakalo eyenzeka emabhizinisini zingagxili enkohlakalweni eyenzeka kuhulumeni kuphela.