Ikhwelo elihlatshwa yiNSFAS kwizitshudeni
ISIKHWAMA esixhasa izitshudeni ngemali yokufunda emanyuvesi nasemakolishi, iNational Students’ Financial Aid Scheme (NSFAS), sesinxuse izitshudeni ukuthi zisayine ifomu yesivumelwano sokuthi zizoxhaswa yilesi sikhwama.
Isikhulu esiphezulu sesikhwama, uMnuz Stephen Zwane, sithe ezinye izitshudeni azikawasayini amafomu asuke eyisivumelwano phakathi kwalesi sikhwama nazo sokuthi zizothola uxhaso.
Usho lokhu nje kunesikhalo kwizitshudeni ngokuthi ayiphumi ngesikhathi imali yoxhaso nokuholele ekutheni kwezinye izikhungo zibhikishe.
Umbhikisho ubudalwa wukungaphumi kwemali yokudla, kwezinye izikhungo wukungaphumi kwemali yezindawo zokuhlala nemali yokugibela.
UZwane uthe uma izitshudeni zingawasayinile amafomu abakwazi ukuqhubeka nokuzixhasa.
“Enye yezingqinamba esibhekene nazo ngukuthi izitshudeni azisayini amafomu. Lokhu kuyasibambezela ngoba asikwazi ukukhipha imali,” kusho uZwane.
Uthe uma sebesayinile imali bayidedela ngaphandle kokunanaza ngoba abakwazi ukukhipha imali bengazi ukuthi bayinika bani.
Usho kanje nje uNgqongqoshe weMfundo ePhakeme, uNkk Naledi Pandor, uzwakalise ukukhathazeka ngokuthi kunezitshudeni ezingazitholile izimfanelo zazo zoxhaso.
Ukhale ngokuthi lokhu kuyabambezela ngoba izitshudeni zilinda into ezingayazi.
Uthe bazosebenzisana nalesi sikhwama ukuze kuxazululwe zonke izinkinga ezikhona eziphakanyiswa yizitshudeni.
UNkk Pandor uthe izitshudeni ezixhaswayo kudingeka ziphase ukuze uxhaso luqhubeke.
“Izitshudeni siyazinxusa ukuthi zisayine amafomu ukuze zixhaswe. Uma zingasayini kunzima ukuzixhasa. Ngiyalele iNSFAS ukuthi ilungise zonke izinselelo ezibhekene nazo ukuze kuqedwe izinkinga ezibhekene nezitshudeni,” kusho uNkk Pandor.
Uthe uzonaba kabanzi ngezinye zezinto esabelweni sezimali ngenyanga ezayo.
Uqhube wathi izikhungo zemfundo kumele zibe nabasebenzi abazokwazi ukuphendula imibuzo ethinta iNSFAS.