Bafundiswe ukukhetha imikhakha
BABHEME bakholwa abafundi bezikole zamabanga aphezulu ngoLwesibili befundiswa ngezinhlobo zemikhakha abangayilandela uma beqeda u-matric.
Kulo mcimbi obuhlelwe yiBusi M Foundation neTongaat Hullet obizwa ngeCareer Day, ubuhlanganisa abafundi bakwamatric abangaphezu kuka-500.
Izikole ebeziyingxenye yalo mcimbi yiMhawu, iPhambili, iSkhwama neVukuzakhe High. Imikhakha obekugxilwe kuyo ngowezesayensi, ezolimo, ezobudokotela, ezobunjiniyela nezomnotho namabhizinisi.
Inhloso yale Career Day ukunikeza abafundi ithuba lokuzikhethela ukuthi yimiphi imikhakha abangayilandela, ikakhulukazi lena ebonakala esenamathuba amaningi.
Umsunguli walo mcimbi, uNksz Busisiwe Mdletshe, uthe wayiqala ngo-2015 ngoba ebona isidingo sokuhlomisa abafundi. “Sibonga ukulekelelwa abakwaTongaat Hullet abasisize ngezinsiza nangokuxhasa abanye abafundi ngemali yokufunda emanyuvesi,” kusho uNksz Mdletshe.
UNksz Nkonzo Mhlongo oyiSocio-Economic Development Manager kwaTongaat Hullet, uthe kubalulekile ukuthi abafundi bathathe imikhakha ehambelana nabo nabazoyithanda.
“Ezolimo nezobunjiniyela ngeminye yemikhakha ebalulekile emhlabeni, yingakho sibakhuthaza abafundi ukuthi bayilandele,” kusho yena.
Uthishanhloko waseMhawu High, uMnuz Msizi Mbhele, uthe lolu suku lubasize kakhulu ukukhuthaza abafundi bakhe.
“Ngitshele abafundi bethu abangu-62 kwaGrade 12 ukuthi basebenze kanzima bazimisele. “Kumele basebenzele ukufeza amaphupho abo, bathole imiphumela emihle, bangadikibaliswa ukuthi baphumaphi,” kusho uMbhele.
UMnuz Londa Luthuli onguthishanhloko wasePhambili High, uthe bajabulile ukuba ngesinye ngesinye sezikole esikhethwe ukwethamela iCareer Day.
“Saziwa njengesikole esingenzi kahle kodwa lolu suku lusibuyisele ithemba. Siyabakhuthaza bonke abafundi ukuthi baphase kahle kwamatric ukuze bakwazi ukungena emanyuvesi,” kusho uLuthuli.
Uthishanhloko waseVukuzakhe uMnuz Edgar Thabane uthe ngokwesibili isikole sakhe simenywa kulo mcimbi futhi kuyabasiza ukuze abafundi bachazeleke ngezinhloko zemisebenzi abangayenza uma sebeqe isikole.
Abanye abebeyingxenye yalo mcimbi uMnyango wezemiSebenzi yoMphakathi esifundazweni, iDurban University of Technology; abakwaCocaCola; University of KwaZulu-Natal Medical School; South African Institute of Chartered Accountants; Naidu Consulting Civil Engineers neMangosuthu University of Technology.