ISuperSport iphambili kwabafuna uLuc
ISUPERSPORT United izihola phambili emaqenjini afuna ukusayinisa umqeqeshi weFree State Stars uLuc Eymael.
Isolezwe lihabule lezi zindaba ngomthombo walo othembekile ukuthi lo mqeqeshi odabuka eBelguim uzobe engekho ebhentshini leStars ngesizini ezayo.
“ISuperSport iyona esahamba phambili njengamanje emaqenjini afuna ukusayinisa uLuc. IChiefs ike yayithinta iFree State Stars kodwa abazange bangene ezingxoxweni. ISuperSport iyamfuna ngempela uLuc. Yebo inkontileka yakhe inombandela wokuthi iqembu elimfunayo kumele kube nesamba esithize semali elisikhokhayo kodwa akuyona imali ebabazisayo,” kusho umthombo.
U-Eymael ufike iFree State idonsa kanzima. Iqembu liqale isizini libalwa namaqembu abesengozini yokugawulwa yizembe kodwa u-Eymael wafika walishintsha. ISuperSport ayinaye umqeqeshi. Ihlukane no-Eric Tinkler obecija iqembu kodwa waphikwa yimiphumela maphakathi nesizini. UKaitano Tembo nguyena osabambe izintambo njengoba iqembu lisathungatha umqeqeshi omusha.
UMike Makaab weProSport International okuyinkampani ephethe izindaba zika-Eymael uthe amaqembu afuna lo mqeqeshi akaxhumane neqembu lakhe. “ULuc unenkontileka neFree State Stars. Amaqembu anentshisekelo yokuxoxa naye ngenhloso yokuthi azowaqeqesha awaxhumane neqembu lakhe. Njengamanje ugxile emsebenzi wakhe kwiFree State. Alikho iqembu esikhuluma nalo.”
U-Eymael ufake iStars kowamanqamu weNedbank Cup. Kowamanqamu uzodudulana neMaritzburg United eCape Town Stadium, eKapa ngoMeyi 19. Uke wayibamba nakwiPolokwane City. Nayo wayithatha ibalwa namaqembu angasali uma kukhulunywa ngezembe kodwa wafike wayishintsha. Ngesizini edlule iPolokwane iqede kwiTop 8 okokuqala emlandweni wayo.