Okuyisithiyo endleleni yoweDowns
ISITOBHA seMamelodi Sundowns, uSoumahoro Bangaly, sibona ukudlala eNingizimu Afrika kuwafiphaza amathuba okuqokelwa eqenjini lesizwe laseIvory Coast.
UBangaly usayine kwiSundowns ngo-2015 esuka kwi-Asec Mimosas yangakubo. Nokho ukulimala kugcine kumlahlekisele ngendawo esikimini somqeqeshi uPitso Mosimane. Nyakenye kusabalale imibiko yokuthi uzobolekiswa kodwa kwagcina kungenzekanga.
Namanje ubhekene nobunzima bokuhlwitha ijezi kuRicardo Nascimento waseBrazil odlala ngokuzwana noWayne Arendse maphakathi emuva kwiSundowns.
UBangaly uthe nakuba ekujabulela ukudlala kwi-Absa Premiership kodwa kumenzela phansi uma sekuqokwa iqembu lesizwe langakubo ngoba abaqeqeshi babheka kakhulu abadlali abadlala phesheya kwezilwandle.
I-Ivory Coast isemazweni ahlonishwayo ebholeni lomhlaba ahlulekile ukuzibekisela indawo koweNdebe yoMhlaba ozoqala eRussia ngenyanga ezayo.
“Akulula uma ungumdlali odlala e-Afrika. Bonke abaqeqeshi babheka abadlali abadlala e-Europe. Kodwa iSundowns iyiqembu elikhulu elidlala kwiChampions League futhi umqeqeshi uhlale engitshela ukuthi angihlale ngizama ukuba sesikimini. Uhlale elwa nami ethi kufanele ngidlale ukuze ngingene eqenjini lesizwe. Akulula kodwa ngoba ngidlala e-Afrika, kufanele ngenze kahle ngokuphindiwe ngidlale yonke imidlalo.
“Ukudlala e-Afrika akukwenzi ulingane nozakwenu odlala phesheya kwezilwandle. Uma edlala eFrance kuqokwa yena. Kodwa iqiniso lithi okubalulekile okwenza enkundleni. Ngiyazi ukuthi ngihamba phambili ngiyalazi ibhola. Ukuba bekungenjalo ngabe angikho kwiSundowns,” kusho uBangaly.
Nakuba uBangaly engafakanga isandla kangako empumelelweni yeSundowns kule sizini kodwa ukholwa wukuthi ukuba sezingeni eliphezulu kozakwabo kwenze wathobeka enhliziyweni, wethemba ukuthi bazowenza umsebenzi.
ISundowns isizibekisele indawo kwiCaf Champions League okwesihlanu kulandelana. Kule sizini isidlulele esigabeni samaqoqo. Izoqala amaqoqo ngeWydad Casablanca yaseMorocco ngoMeyi 5 eLoftus Versfeld.
“Emaqenjini amakhulu kuhlale kunabadlali abasezingeni eliphezulu. KwiSundowns bonke abadlali bakulelo zinga, kufanele ulwele indawo yokudlala. Angiphatheki kabi ngokuhlala ngaphandle ngoba ibhola linjalo, kungenzeka noma yini. Uma ulimala lapha kwiSundowns uzwa ubuhlungu ngoba kufanele ubuye uzolwa. Ngikulungele manje ukulwela indawo yami ngibuyele eqenjini,” kusho uBangaly.
“Kungaba yinto enkulu kimina ukuwina iligi neSundowns. Onyakeni wami wokuqala siyiwinile, kowesibili sahluleka. Ngiyabethemba ozakwethu nabaqeqeshi.Kulo nyaka singayiwina iChampions League.”