Ubeyofihla uninakhulu u-Akhumzi
UBESENDLELENI eyongcwaba ugogo wakhe u-Akhumzi Jezile (29) wodumo lweYOTV futhi obengumdidiyeli wohlelo lomculo kuSABC 1, iLive Amp, okushaqeke iningi kuzwakala ngokudlula kwakhe emhlabeni engozini yemoto, e-Eastern Cape, ngoMgqibelo ekuseni.
U-Akhumzi, Siyasanga Kobese owaduma ecula eqenjini iJoyous Celebration, Thobani Mselemu obesezakhele igama ngokubonakala ezikhangisweni zekwithelevishini, uSkhumbuzo Mbuthuma obeyisazi sezobuchwepheshe besimanje nomunye ebelingakaveli igama lakhe, kuvela ukuthi bashone ujuqu imoto abebehamba ngayo ishayisana nenye emgwaqweni onguthelawayeka, uN6 eduzane kwaseQueenstown.
ULindelani Mkhize, obesondelene no-Akhumzi futhi owake wasebenza noSiyasanga kwiJoyous, uthe namanje basashaqekile.
“Ngesikhathi behamba bangitshelile ukuthi sebeyasuka. U-Akhumzi ubeya emngcwabeni kagogo wakhe ezoya nasemshadweni wesihlobo sakhe. Laba abanye ngoba nabo abakhona e-Eastern Cape bacela ukuhamba naye ukuze baye emakhaya,” kuchaza uLindelani.
“Sisasangene ngempela ngokwenzekile, sisamangele futhi sishaqekile. Ikusasa likaAkhumzi beliqhakazile njengoba ebengumuntu onekhono elimangalisayo uma kuziwa ekubeni uphrojusa nomqondisi wezinto ezehlukile kwithelevishini. Besisondelene kakhulu futhi into ebisenza sisebenze kakhulu ndawonye wukuthi ubengumuntu okhuthele futhi kukuningi esibona ngaso linye kukhona,” kusho uLindelani.
Uthe u-Akhumzi noSiyasanga ubungeke ubahlukanise njengoba bebekuthanda ukuhlala bobabili.
“Bobabili bebethanda ukudlala nokuhleka. Bebengabangani abakhulu. IJoyous, kusuka kwabadala kuze kube yilaba abakhona manje basathukile ukuzwa lezi zindaba,” kuchaza uLindelani.
UPercy Vilakazi okhulumela umndeni wakwaJezile uthe okwamanje umndeni ushaqekile ngalesi sigameko.
“Bangabantu abakholelwa kakhulu kuNkulunkulu njengoba no-Akhumzi bekungumuntu okholwayo. Umthandazo yiyona into abathembele kuyo manje ukuze bakwazi ukwemukela lezi zindaba,” kuchaza uVilakazi.
Uthe okwamanje abakazi ukuthi izinhlelo zezinkonzo zalaba zizohlelwa kanjani kodwa bazokhipha konke ekuhambeni kwesonto.
UCaptain Namhla Mdleleni okhulumela amaphoyisa aseEastern Cape uthe kusaphenywa ngembangela yale ngozi.
Uthe imizimba yabantu abathathu isihlonziwe kushoda ababili akade bekhona emotweni ebihamba o-Akhumzi
Ne-ANC nalo lidlulisele amazwi enduduzo emndenini yalaba ngokudlula kwabo emhlabeni.
Okhulumela leli qembu uPule Mabe uthe kubathusile ukuzwa lezi zindaba beyiqembu.
“Laba bobathathu bathinte impilo yabantu bakuleli ngezindlela ezihlukene. Sifisa ngathi imindeni yabo ingathola amandla kulesi sikhathi esinzima njengoba besazama ukwamukela lezi zindaba,” kusho uPule.
Uthe benguKhongolose bathemba ukuthi imindeni yalaba izothola ukududuzela njengoba kungalinyalelwe bona bodwa kodwa lonke elakuleli.