Ziqothwe ngenhlamvu izelamani eNquthu
USADUMELE umndeni wezelamani zakwaZwane, eZungwini, eVryheid, ezidutshulwe zabulawa ziphelezele umakhelwane wazo okade eyokhehla ingoduso yakhe eNquthu, endaweni yaseNondweni.
Lesi sigameko, esishiye abaningi bedangele, kuthiwa senzeke emzini wakwaNkosi ngoMgqibelo ebusuku.
UNkululeko (27) no-Andile Zwane (20) kuthiwa badutshulwe babulawa abalisa abangaziwa akade behlezi nabo kulo mcimbi.
UNkululeko kuthiwa ushonele endaweni yesigameko kwathi u-Andile washonela esibhedlela saseNquthu.
Likhuluma neSolezwe elinye lamalungu omndeni, uMnuz Sibusiso Maduna, lithe yize ebengekho emcimbini akade zikuwona (izelamani) kodwa kuvela ukuthi kube nengxabano ebe khona laba sebefuna ukulala.
“Njengenjwayelo uma kufika abantu basemzini banikwa indlu yabo abazoyisebenzisa. Nabo kuthiwa bebehlezi kuleyo ndlu nokugcine ngokuthi kungene kuyo abantu basendaweni abahlale nabo,” kusho uMaduna.
Uthe ngesikhathi sebefuna ukulala ebusuku bacele laba abangamalungu omphakathi ukuthi bahambe ukuze babadedele endlini balale.
“Laba basendaweni sengathi bebengafuni ukuhamba nokugcine kubaphoqa ukuthi babakhiphe ngenkani kwaba khona umsindo oqalayo. Kuvela ukuthi babajahe baze babakhiphela ngaphandle kwesango lomuzi,” kuchaza yena.
Uthe kube sekuba nombiko othi kukhona umuntu osetholakele oseshonile nokusolakala bona ukuthi bambulele.
“Laba balisa abadubulile kuthiwa babe sebehamba babuya sekulelwe sebehlomile bazovulela ngenhlamvu kulaba bobabili,” kuchaza yena.
Uthe lesi sigameko sibaphathe kabuhlungu bengumndeni njengoba laba bazi kahle ukuthi abathinteki esigamekweni sokubulawa kowesilisa otholakale eshonile.
Okhulumela amaphoyisa KwaZuluNatal, uColonel Thembeka Mbhele, usiqinisekisile lesi sigameko wathi kusaphenywa.
“Kutholakale isidumbu sowesilisa oneminyaka engu-31, sishayiwe silimele kabi ekhanda. Kube sekutholakala nemizimba yezelamani ezimbili, zinamanxeba okudutshulwa. Okwamanje ayikaziwa imbangela yalokhu kubulala,” kusho uColonel Mbhele.
Uthe akukaboshwa muntu okwamanje.