Ubambe umoya ebeletha amawele
UCISHE wabelethela amawele endleleni ngoLwesithathu owesifazane wasePomeroy, eMsinga, osikwe kungakabi yisikhathi wase ephuthunyiswa emtholampilo oseduze.
UNksz Nonjabulo Buthelezi (23, ) ubehlelelwe ukuyobeletha esibhedlela, eGrey’s, eMgungundlovu, namuhla ngenxa yobucayi besimo sakhe.
UNksz Buthelezi onengane eneminyaka emine, uthe ubengasathembi ukuthi kuzohamba kahle ekubeletheni kwakhe, okuphoqeleke ukuthi aye emtholampilo oseduze ngenxa yokuthi bese kukude eMgungundlovu. Utshele Isolezwe ukuthi ubengakholwa ukuthi uyasikwa ngoLwesithathu, ubone ngoba kuqina izinhlungu. “Bengingakaze ngibe nenkinga ngisahamba umtholampilo ngikhulelwe kodwa ngatshelwa ukuthi kuzomele ngibelethele esibhedlela ngoba izingane zihlangene ngomzanyana owodwa esiswini. Kuthe sengiqiniswa imisiko ngazibuza ukuthi ingabe ngizosizakala yini emtholampilo ngoba bekuzomele ngilinde ne-ambulensi. Ngihanjiswe uyise wezingane emtholampilo oseduze, okuthe uma bengihlola bathola ukuthi amakhanda ezingane asezovela.” Uthe abahlengikazi abapholisanga maseko, bamtshela ukuthi useyabeletha. Yize konke kuhambe kahle wabeletha ngaphandle ngokuhlinzwa, elinye iwele lizalwe linesisindo esincane kakhulu.
Izolo uNksz Buthelezi, osedluliselwe eGrey’s , uthe iwele lisanenkinga yokwehla nokwenyuka kakhulu kukashukela.
Uthe akakazi ukuthi bazophuma nini esibhedlela. Uveze ukuthi ubevele esazi ukuthi ukhulelwe intombazane ayiqambe ngoZenande nomfana uSiyabonga futhi akuqali ngaye ukubeletha amawele emndenini.
Unina uyiwele kanti noyise wezingane, uMnuz Kwenzakwandi Shabalala, uyiwele.
Umphathi emtholampilo ePomeroy, uDkt Sanele Madela, owaqeqeshwa eCuba, uthe kudingeke basheshe bambelethise uNksz Buthelezi.
“Uma umuntu ekhulelwe amawele sikhuthaza ukuthi abelethe esibhedlela ngoba kukhona zonke izinsiza ukuze uma kudingeka ahlinzwe kusheshe. Besikhathazeke kakhulu ngokopha okujwayele ukuba yinkinga kumama, emuva kokubeletha, okuyikona okubulala abasuke bebeletha. Sibeke zonke izinto ngononina ukuze sigweme ukopha,” kusho uDkt Madela.
UNgqongqoshe wezeMpilo KwaZuluNatal, uDkt Sibongiseni Dhlomo, ubonge uDkt Madela nabahlengikazi abasize uNksz Buthelezi.
Ukhuthaze abesifazane abakhulelwe ukuthi babe seduze nalapho bezobelethela khona uma sekusondele isikhathi sokubeletha.