Kuzolungiswa amahhovisi amaphoyisa
UMASIPALA weTheku ubeke uR35.9 million wokulungisa ingqalasizinda ezikhungweni zamaphoyisa alo mkhandlu.
Lezi zindaba zivele emhlanganweni womkhandlu obungoLwesine olwedlule.
IPhini leMenenja ophikweni lwezezimali, uMnuz Krish Kumar, lithe kuzolungiswa izakhiwo zamahhovisi amaphoyisa kamasipala, kufakwe amaair conditioner amasha, kulungiswe izitebele zamahhashi kwakhiwe nesiteshi samaphoyisa kamasipala esisha eVerulam.
Esitatimendeni esithunyelwe kwabezindaba kuvele ukuthi kuzolungiswa ikomkhulu lamaphoyisa kamasipala eliku-16 Archie Gumede Place, kulungiswe isikhungo sokuqeqesha amaphoyisa, isiteshi saKwaMashu, isiteshi esiqanjwe ngoKhuzimpi Shezi esiseMlazi Station kuphinde kwakhiwe isiteshi samaphoyisa kamasipala esizoba namahhashi nesokugcina impahla eQueensburgh.
Umsebenzi wokuthuthukisa ingqalasizinda uzoqala ngoR7.2 million kulo nyaka.
UKumar uthe amahhovisi amaphoyisa kamasipala madala yingakho edinga ukuthuthukiswa ingqalasizinda.
Ubalule ukuthi kuzofakwa namakhamera lapho kugcinwa khona izibhamu nenye impahla ukuqinisekisa ukuthi ayilahleki.
“Amaphoyisa abalulekile emkhandlwini weTheku ngoba yiwona enza idolobha lethu liphephe, avimbe ubugebengu aqinisekise nokuthi imithetho yedolobha iyahlonishwa. Kuvele ukuthi ezinye izakhiwo zamaphoyisa kamasipala ziba namaconsi uma lina, amakhebuli kagesi asobala kanti namapayipi endle awasasebenzi kahle. Muningi umonakalo okhona njengoba nephawundi laseSiphingo liwelwe wucingo,” kusho uKumar.
IPhini leMeya kaMasipala weTheku, uNkk Fawzia Peer elinguSihlalo wezokuPhepha nezimo eziPhuthumayo kuMasipala weTheku, uthe kubalulekile ukuthi kulungiswe ingqalasizinda ezikhungweni zamaphoyisa manje kwazise kuzodla imali eningi uma zilungiswa sekuhambe isikhathi.
Kuphinde kwavela ukuthi umasipala ubeke uR10 million wokuthuthukisa intsha yaseThekwini namaphethelo.
Izoqeqeshwa emkhakheni wokudayisa izindlu nokuthuthukisa izakhiwo, kube nemashi yokulwa nezinkinga ezihlukumeza intsha kanjalo nengqungquthela yezolimo ngoJuni.
Kuzoba nendumezulu yefestiveli ezoba sebhishi ngoJuni 16.
UMasipala weTheku uzophinde usayine isivumelwano sokuthi iTourism Indaba ibe seThekwini kusukela manje kuze kube wu-2022.
Isivumelwano sizoba phakathi kukaMasipala weTheku, iTourism KwaZulu-Natal neSouth African Tourism.
UMasipala weTheku ufuna iTourism Indaba ibe kuleli dolobha ngenxa yokuthi ingenisa uR500 million iphinde ilikhangise mahhala idolobha.