ICosatu izomasha ngolwabasebenzi
UKUNYUKA kweVAT, uhlelo lwezempilo iNational Health Insurance (NHI), iholo eliphilisayo ngezinye zezinto umfelandawonye wezinyunyana zabasebenzi iCosatu ezozimashela kusasa ngoSuku lwaBasebenzi.
ICosatu KwaZulu-Natal ihlele amamashi amane ukuzwakalisa ukungenami kwayo ngezinto ezihlukumeza abasebenzi.
UNobhala weCosatu, uMnuz Edwin Mkhize, uthe bazohambisa uhlu lwezikhalazo eminyangweni emine kahulumeni.
Uthe bazohambisa uhlu eMnyangweni kaMgcinimafa bekhala ngokunyuswa kweVAT, isuka ku-14% iya ku-15%, okuzoshaya kakhulu abantu abahluphekayo.
Uthe bazohambisa nezikhalazo ngezinto ezithinta imigwaqo ekhokhelwayo, inkohlakalo nokungaphephi kwabasebenzi.
“Sizohambisa uhlu futhi eMnyangweni wezaBasebenzi ngendaba yokuqedwa kwama-labour broker. Sizothinta noMnyango wezokuThutha ngezinselelo ezibhekene nezokuthutha, ukudilizwa kwabasebenzi nokunye,” kusho uMkhize. Amamashi azoba seMbazwana, Nquthu naseKokstad bese kuthi eyesifundazwe ibe seThekwini lapho izoqala eCity Hall iphelele eCurries Fountain.
Emashini eseThekwini kuzokhuluma iPhini likaMengameli wezwe nele-ANC uMnuz David Mabuza, uMengameli weNehawu uMnuz Mzwandile Makwayiba, uNksz Jenny Schreiner, ilungu lesigungu esiphezulu seSACP, kanjalo noNksz Jabu Mahlangu weSANCO.
UMkhize uthe abasebenzi abangewona amalungu ezinyunyana basengcupheni ngoba abamelwe ngumuntu, yingakho izinyunyana kumele zisebenze ukubafaka ngaphansi kwazo.
“Sizogubha lolu suku nje kunokuhlukana phakathi kombimbi. Isifundazwe sethu sibhekene nezinkinga zokwehlukana, lokhu okucaciswa yizinto ezenzekayo uma kuzohlala imihlangano yamagatsha e-ANC. Yingakho kubalulekile ukuthi sisebenzise lolu suku ukubumba inhlangano kushunyayelwe ivangeli lobumbano,” kusho uMkhize.
Uthe bazosebenzisa lolu suku ukucacisa ngendaba yeholo eliphilisayo elaziwa ngeNational Minimum Wage.
“Abasebenzi kumele bazi ukuthi akekho umsebenzi ozolahlekelwa ngokufakwa kweholo eliphilisayo eliqala kuR20 ngehora. U-6 million wabasebenzi uzohlomula,” kusho uMkhize.
Umgubho osezingeni likazwelonke uzoba sezinkundleni zemidlalo i-Isaac Wolfson, eNelson Mandela Bay, e-Eastern Cape lapho kuzokhuluma uMengameli walo mfelandawonye uMnuz S’dumo Dlamini.