I-Black Sash ikhala ngesinqumo sikaShabangu
INHLANGANO esiza umphakathi, iBlack Sash, izwakalise ukukhathazeka kwayo ngokuhoxiswa kwethenda yokuthi kuqokwe inkampani ezoholela abantu izibonelelo zikahulumeni, obekulindeleke ukuthi ingene esikhaleni seCash Paymaster Services (CPS).
NgoLwesithathu uNgqongqoshe wezokuThuthukiswa koMphakathi, uNkk Susan Shabangu, ufake amaphepha eNkantolo yoMthethosisekelo ecela ukumisa ithenda yokuqoka inkampani ezoholela abantu imali esandleni.
UNkk Shabangu ukhale ngokuthi izinkampani ezifuna ithenda yalo msebenzi zikhala ngokuthi azinikezwanga imininingwane eyanele. Emaphepheni abonwe yiSolezwe iG4S, efuna lo msebenzi, ikhale ngokuthi uMnyango awuyinikanga imininingwane yokuthi bangaki abantu abazoholelwa izibonelelo zikahulumeni nokuthi lowo msebenzi wenziwa ngamalini okwamanje.
Ikhale nangokuthi akulungile ukuthi inkampani eholela abantu izibonelelo, iCPS, iyigodle yonke imininingwane ezosiza ezinye izinkampani ukufaka isicelo.
UNkk Shabangu uthe ngalesi sizathu ukhethe ukuzihoxisa izinhlelo zokuqoka inkampani kuze kube zicutshungulwa kahle izikhalo zezinye izinkampani.
UNkk Angie Richardson, obhekelele ezokuxhumana kwiBlack Sash, uthe ngoMashi babeshilo ukuthi ukugodlwa kwemininingwane yabantu yiCPS akulungile futhi kuzokwenza ezinye izinkampani zingaphumeleli uma sezifake izicelo zokwenza lo msebenzi.
Uthe kusho ukuthi iCPS izoqhubeka nokuholela abantu ngenxa yokuthi uNkk Shabangu uyehluleka ukuyitshela ukuthi idedele imininingwane yabantu.
“Sicela uNgqongqoshe asicacisele ukuthi ithenda izoyibuyiselwa nini futhi, izinkampani ezifake izicelo zizonikezwa nini imininingwane eziyidingayo. Sikhathele wukuthi kulokhu kululwa inkontileka yeCPS exhaphaza abantu ngokudonsa imali kwizibonelelo zabo,”