Ipolitiki ibhuntshise ekugcineni umjaho kaZuma
UKUPHUMA kowayengumengameli wezwe, uMnuz Jacob Zuma esikhundleni kuhoxise abaxhasi bomjaho oqanjwe ngaye.
Lo mjaho ka-42km ubunabaxhasi eminyakeni emithathu selokhu wasungulwa.
Usuka eSeven Oaks ngaphandle kwaseGreytown uye eMshwathi ngaphandle kwaseMgungundlovu.
Umhleli womjaho, uMnuz Celi Makhoba uthe baphoqekile ukuthi bawuhoxise umjaho ngenxa yokungabi khona kwabaxhasi.
UMakhoba uthe ngonyaka odlule bangu-900 abagijimi ababengenele umjaho, kulo nyaka bangu-400 akade bewungenele.
Uthe ubengakamazisi uZuma ngokuhoxiswa kwawo njengoba wayezile ngesikhathi wethulwa eGreytown ngo-2015.
“Besidinga uR800 000 ukuwenza kodwa asizange sibathole abaxhasi. Ngokudlule sasinabaxhasi abaningi okuhlanganisa osomabhizinisi nomasipala,” kusho uMakhoba.
IMeya yaseMzinyathi uMnuz Petros Ngubane oyikhansela kuMasipala waseMvoti owawuxhase umjaho ngokudlule, utshele abezindaba kwaSABC ukuthi umjaho uhoxisiwe ngenxa yokugxambukela kosopolitiki.
Utshele i-Independent Media izolo ukuthi ukushintsha kukahulumeni yikona okuhoxise abaxhasi.
UNgubane uthe uMasipala waseMvoti ubuqasha abantu abazosebenza emjahweni, ufake imali ezinhlelweni zokuwuhlela bathenge nokudla.
“Abahleli beJG Zuma Marathon bafike kithina ngoJanuwari, sabachazela ukuthi asinayo imali. Sizohlela omunye umcimbi ozovala isikhala seJG Zuma Marathon, ozoba phakathi kweNquthu neDundee.
Ngizolwethula emkhandlwini lolu daba futhi size negama elisha,” kusho uNgubane.
UMakhoba ukuphikile ukuthi ushintsho olube khona kuhulumeni yilona oluhoxise abaxhasi.
UNkk Phindile Phungula okhulumela umasipala waseMdloti uthe batshelwe ngesonto eledlule ukuthi umjaho ngeke usaba khona.