Kushayisana imibono kubaqashi nenyunyana
NGEKE ziguqule umthetho izimashi zabasebenzi ezilwa nomthetho wamaholo, iNational Minimum Wage. Lokhu kushiwo yiNational Employers’ Association of South Africa (Neasa).
Isikhulu esiphezulu seNeasa, uMnuz Gerhard Papenfus sithe imashi yangesonto eledlule yeSouth African Federation of Trade Unions (Saftu) ngeke ishintshe umthetho kodwa kufanele kuboniswane kahle.
Uthe wu-23% wezinkampani ezingamalungu eNeasa ezithikamezwe yisiteleka seSaftu, okusho ukuthi amalungu abo amaningi awathintekanga.
“ISaftu ihlale ithi inamalungu angu800 000 kodwa lokhu asikubonanga esitelekeni sayo kwazise izinkampani eziningi bezisebenza njengokujwayelekile. Izinkampani ezithikamezekile ngezisebenza ngensimbi. Siyafisa ukuthi izinyunyana uma zingaboni ngaso linye nomqashi zixoxisane naye kunokuthi zikhiphe abasebenzi bayobhikisha,” kusho uPapenfus.
UNobhala Jikelele weSaftu uMnuz Zwelinzima Vavi, uthe abayifuni iNational Minimum Wage ngoba isho ukuthi abantu bazoholelwa uR20 ngehora, okuyimali encane uma kuqhathaniswa nezindleko abanazo.
Uthe bacele amalungu abo ukuthi amashe ngoba uhulumeni uhlongoza ukuwaphuca ilungelo lokuteleka.
“Sizoqhubeka nokumasha kuze kube uhulumeni ulalela izimfuno zethu. Asifuni ukuthi abantu bethu baholelwe uR20 ngehora ngoba yimali encane kabi lena, uma uqhathanisa ukukhula kwamandla emali, izindleko zokunyuka kukaphethroli nentela ekhokhwa uma uthenga impahla,” kusho uVavi. Kolunye uhlangothi uNobhala jikelele weCosatu, uMnuz Bheki Ntshalintshali uthe bayawazi umehluko ozokwenziwa yiNational Minimum Wage ngoba kunabasebenzi basezindlini abahola uR11 ngehora, kube abasemapulazini abahola imali engaphansi kuka R10 ngehora ngakho ukuhola uR20 ngehora kuzoletha umehluko omkhulu kubasebenzi.
UPapenfus uthe izinyunyana kufanele zixoxe nabaqashi ngaphambi kokwenza izimfuno ezingaphezu kwamandla abaqashi.
“Izinyunyana zifuna ukutshela abaqashi ukuthi benzeni, azigxili ekutheni kufanele kuthuthukiswe imfundo yabantu ukuze babe namathalente adingwa yizimboni. Izinyunyana azikwazi ukunyusa isibalo samalungu azo, baningi abasebenzi abangekho ngaphansi kwezinyunyana ngakho ukumasha akuwushintshi umthetho kodwa ukubonisana kwabasebenzi nabaqashi yikona okuzoletha umehluko,” kusho uPapenfus.