I-Unisa ikhathazekile ngezinsolo zokucwasa
UMKHANDLU wenyuvesi i-Unisa ukhathazekile ngezinsolo zokucwasa ngokwebala, ukuhlukumeza nokuhlushwa kwabafundi okubikwa kule nyuvesi.
Umkhandlu uthi labo abatholakala ukuthi bayathinteka kulezi zinsolo kumele bathathelwe izinyathelo.
Okhulumela inyuvesi, uMnuz Martin Ramotshela, uthe inyuvesi iyazigxeka zonke izehlakalo ezithinta ukucwasa nokuhlukumeza ezibikwa mihla kulesi sikhungo.
“Siyanxusa abafundi nabasebenzi ukuthi bazibike izehlakalo zokucwaswa ngokwebala. Kunezinhlelo ezikhona enyuvesi zokubika amacala afuze lawa. Inyuvesi kumanje iyabhekana nalezi zinsolo,” kusho uRamotshela.
Uthe umkhandlu uyalele inyuvesi ukuthi ibheke imigomo yayo ezintweni ezithinta amacala athinta ukucwasa ngokwebala.
“Umkhandlu ufuna kusheshiswe amacala aphenywayo athinta ukuhlukunyezwa nokucwasa. Kumanje inyuvesi isebenzisana neSouth African Human Rights Commission (SAHRC), ukuphenya amacala athinta ukucwasa.”
Uthe inyuvesi kumele kube yinkundla abantu abazokhululeka kuyona.
Uqhube wathi kumele kuqinisekiswe ukuthi wonke umuntu enyuvesi ulandela imigomo ebekiwe ukuze abantu bengazizwa bengamukelekile.
NgoLwesithathu inyuvesi ibize isithangami nabezindaba lapho ibizokhuluma ngezinto ezibikwe abafundi nabasebenzi ezithinta ukucwaswa.
URamotshela uthe kubikwe nezehlakalo zokuhlukunyezwa ngokocansi abaziphenyayo.
“USolwazi Mandla Makhanya, umphathi wenyuvesi, nguyena ozokhuluma ngezinto ezinye zazo ezibikwe ezinkundleni zokuxhumana. Sizokhuluma nangezinto ezithinta ukuxhaswa kwabafundi yisikhwama sezimali, iNational Students’ Financial Aid Scheme.”
Kuke kwaba nesiteleka sabafundi kule nyuvesi, bekhala ngokuhamba kancane endabeni yokuxhaswa ngemali yokufunda.
UNgqongqoshe weMfundo ePhakeme, uNkk Naledi Pandor, uyalele iNSFAS ukuthi ilungise zonke izinkinga nezikhalazo zabafundi njengoba kunabafundi namanje abangakaxhaswa ekubeni bafaka izicelo zoxhaso nyakenye.