‘Basazodonsa kanzima abathengi’
ISAZI esisiza abacwile ezikweletini, uMnuz Neil Roets, sithi abantu mababophe izifociya ngoba umthelela wentela ekhokhwa uma uthenga impahla iValue Added Tax (VAT) nokunyuka kukaphethroli sekuqalile ukuzwela.
“Abathengi baseNingizimu Afrika bakweleta uR1.37 trillion uma behlangene. Lokhu kusho ukuthi abantu kufanele babophe izifociya bangadali izikweletu ezintsha ngoba kusazoshuba. IVAT inyuke ngo-Ephreli 1 kanti uphethroli unyuka ngoLwesibili ngo-58 cents bese udizili unyuka ngo-59 cents ilitha,” kusho uRoets.
Uthe ukunyuka kukaoyela ongahluziwe nokuntenga kweRandi yikona okunyusa uphethroli.
“Akukho ukubalekela izindleko zikaphethroli ngoba nabampofu bayazikhokhela uma behamba ngamatekisi namabhasi. Imali yokugibela iyanyuka, kuzonyuka intengo yokudla neyayonke impahla,” kusho uRoets.
Uphinde waveza ukuthi abampofu yibona abashayekayo uma kunyuka impahla ezweni ngoba vele abanamali kanti banezikweletu eziningi okusho ukuthi bazodonsa kanzima.
“Kukhohliswa abantu ukuthi abampofu abahlangani neVAT, amanga lawo ngoba zincane kabi izimpahla ezingayikhokhi iVAT ezitolo. Okunye ukudla esikudlayo kuneVAT. Kubuhlungu ngoba abantu abampofu bayagoduka baye emakhaya uma besebenza emadolobheni, lokhu kusho ukuthi ama-toll gate anyukile, kunyuke nophethroli. Osomatekisi bazozidlulisela kubagibeli izindleko okusho ukuthi abampofu nabasebenzi bazokhokha,” kusho uRoets.
Uthe uma kunyuka uphethroli yonke impahla iyanyuka, kwazise ithengwa kwamanye amazwe kanti nethengwa kuleli idinga uphethroli ukuya ezindaweni ezihlukene.
“Siyathemba uhulumeni uzokwandisa impahla engayikhokhi iVAT. Ukunyuka kukaphethroli nama-tollgate yinto abangazukuyibalekela abantu. Ngicela bakhokhele izikweletu zabo, bangadali ezintsha ngoba ucwaningo luveza ukuthi abantu abakhokhi ngesikhathi. Abampofu yibona abazoshayeka kakhulu,” kusho uRoets.
Kolunye uhlangothi inhlangano esiza umphakathi eMgungundlovu, iPietermaritzburg Agency for Community Social Action (Pacsa), ithi ukunyuka kwentela ekhokhwa uma uthenga impahla esitolo kunyuse ubhasikidi wegilosa wafika kuR3 144.02.
IPacsa yenza ucwaningo ngentengo yokudla okudingwa yimindeni nyangazonke, ithe ngoSepthemba wonyaka odlule ubhasikidi ububiza uR2 885.73 kodwa ngenxa yokunyuswa kweVAT usubiza uR3 144.02.